Санитария-эпидемиологик осойишталик ва жамоат саломатлиги хизмати раҳбари ўринбосари Нурмат Отабеков АОКА ҳузурида «Ўзбекистонда коронавирус билан боғлиқ вазият, вакцинация жараёнларига тайёргарлик» мавзусида 17 март куни бўлиб ўтган матбуот анжуманида коронавирус ташхиси қўйилиб, Зангиотадаги шифохонада вафот этган беморнинг ўлими коронавирус бўйича статистикага киритилмаганига изоҳ берди.
Санитария-эпидемиологик осойишталик ва жамоат саломатлиги маркази Тошкент шаҳар бошқармаси бошлиғи Малика Қудратхўжаева Халқ депутатлари Тошкент шаҳар Кенгашининг 36-сессия иштирокчиларига қилган маърузасида 2021 йилнинг 5 март куни Мирзо Улуғбек туманида жойлашган таълим муассасаси тарбиячиси М. М.нинг қайнотаси Зангиотадаги шифохонага коронавирус инфекцияси ташхиси билан етказилгани ва 7 март куни вафот этгани ҳақида маълум қилганди.
Ўзбекистонда коронавирус инфекцияси қайд этилганлар сони, тузалганлар ва вафот этганлар ҳақида статистикасини юритишга масъул ҳисобланган Соғлиқни сақлаш вазирлиги маълумотларида мамлакатда 10 февралдан бери коронавирус асоратлари оқибатида бирорта ўлим қайд этилмаган. Ўшанда касалликдан вафот этганлар сони 622 нафарга етгани кўрсатилган.
Нурмат Отабековнинг сўзларига кўра, Жалилов исмли бемордан дастлабки олинган намуна мусбат натижа кўрсатган ва бемор Зангиотадаги шифохонага ётқизилган. Зангиотадаги шифохонада референс лаборатория мавжуд бўлиб, у ерда олинган намуна манфий натижа кўрсатган.
«Ҳозирда соғлиқни сақлаш вазирлиги патологик анатомия текширишлар натижаларини кутмоқда. Қачонки мутахассислар қайд этилган ўлим бевосита коронавирус билан боғлиқ эканлигини тасдиқласа, у ҳолда бу статистика рақамига қўшилади», — деган Нурмат Отабеков.
Санитария-эпидемиологик осойишталик ва жамоат саломатлиги хизмати раҳбари ўринбосарининг таъкидлашича, коронавирусдан вафот этганлар сони 622 та ёки 623 та бўлиши статистика учун «жиддий об-ҳаво яратмайди».
Эслатиб ўтамиз, Шавкат Мирзиёев 2020 йилнинг 28 августида ўтказилган йиғилишда Ўзбекистонда коронавирус бўйича ҳақиқий ҳолат рақамларини яширишга мутлақо йўл қўймаслик тўғрисида барча раҳбарларни огоҳлантирганди. Бунга уриниш жиноий жавобгарликкача бўлган қатъий чораларга олиб келиши мумкинлиги таъкидланганди. «Юксалиш» умуммиллий ҳаракати ҳам коронавирус бўйича ҳақиқий статистикани яширмасликка чақирган.
Соғлиқни сақлаш вазирлигидагилар эса коронавирус статистикасини сохталаштиришдан манфаатдор эмаслигини таъкидлаб келади.
«Республикада бу касалликка чалинганлар, вафот этганлар сонини яширишдан ҳеч қандай манфаат йўқ. Касаллар сони 100 тага кўп ёки 100 тага кам, ўлим кўрсаткичи бирмунча кўп ёки кам эканлиги аҳамиятсиз, энг асосийси, биз ҳар бир касаллик манбасини жиловлашимиз, ўша касаллик ўчоғида эпидемияга қарши тадбирларни амалга оширишимиз керак бўлади», — деган эди Нурмат Отабеков аҳолидан келиб тушган саволларда сўнгги вақтларда ўлим ва касалланганлар бўйича реал рақамлар хусусида ишончсизлик келтириб чиқараётган ҳолатлар ҳақида 2020 йилнинг июлида берган изоҳида.
Вазирлик раҳбари эса расмий статистикага тўла ишонади.
Изоҳ (0)