2021 йил охирига қадар Тошкент шаҳрининг барча аҳолисига «ақлли» газ ҳисоблагичлар ўрнатилади. Бу ҳақда «Ҳудудгаз пойтахт» газ таъминоти филиали томонидан ўтказилган матбуот анжуманида маълум қилинди.
«Ҳозирда пойтахтимизда газ истеъмолчилари жами 629 427 та бўлиб, шулардан 448 073 тасини кўп қаватли, 181 354 тасини эса ерли аҳоли хонадонлари ташкил этади. Қайд этиш керакки, йил охирига қадар замонавий ‘ақлли’ ҳисоблагичлар барчага ўрнатилиши кўзда тутилган. Мазкур ҳисоблагичларни ўрнатиш аҳоли учун бепул ҳисобланиб, ташкилот томонидан 5 йиллик бепул сервис хизмати ҳам кафолатланади», — дейилади хабарда.
Бундан ташқари, тадбир давомида табиий газ истеъмолчиларига янада қулайлик яратиш мақсадида Call-маркази (55) 503-28-28 ишга тушгани эълон қилинди. Шунингдек, соҳадаги қонунбузарлик ва коррупция ҳолатлари бўйича (55) 503-90-17 ишонч телефони йўлга қўйилган, бунга истеъмолчилар ўз мурожаатларини қолдириши мумкин.
Аввалроқ Ўзбекистонда янги газ ҳисоблагичларни жорий этиш тезлаштирилгани, Тошкент вилоятида ўчиб қолган газ ҳисоблагичларни ўрнатиш вақтида далолатномалар нотўғри расмийлаштирилгани тўғрисида хабар берилганди.
Изоҳ (0)