Бухоро вилоятининг Когон шаҳрида фуқаролар номига расмийлаштирилган 215 миллион сўм кредит пулини ўзлаштирган жамият раҳбари ҳамда «Халқ банки» мутахассисига жиноят иши қўзғатилди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Когон шаҳридаги «К.С.» МЧЖ раҳбари Р.М. ҳамда «Халқ банки» Когон шаҳар филиали мутахассиси Ш.А. олдиндан тил бириктириб, тўрт нафар фуқаро номига ажратилган жами 43 миллион сўм кредитни масъулияти чекланган жамият ҳисоб рақамига ўтказган. Шунингдек, тўққиз нафар фуқаро номига 172 миллион сўм микроқарзни расмийлаштириб, талон-торож қилган.
Ҳуқуқ-тартибот идоралари томонидан жиноятчиликка қарши курашиш бўйича зарбдор ойлик доирасида ўтказилган текширувда ушбу маблағларнинг ўзлаштириш йўли билан талон-тарож қилингани аниқланган.
Мазкур ҳолат юзасидан фуқаролар Р.М. ҳамда Ш.А.ларга нисбатан Жиноят кодексининг 167-моддаси (ўзлаштириш ёки растрата йўли билан талон-тарож қилиш) билан жиноят иши қўзғатилган. Тергов ҳаракатлари олиб борилмоқда.
Изоҳ (0)