Ўзбекистон Президенти Шавкат Мирзиёев 16 март куни «Лукойл» компанияси президенти Вагит Алекперовни қабул қилди. Бу ҳақда Президент матбуот хизмати хабар қилди.
Учрашувда Вагит Алекперов давлат раҳбарига мамлакатда Россиянинг етакчи нефть-газ компанияси иштирокидаги устувор инвестиция ва ижтимоий аҳамиятга эга лойиҳалар амалга оширилишининг бориши тўғрисида батафсил маълумот берди.
Бугунги кунда «Лукойл» Ўзбекистон иқтисодиётига сармоя киритаётган энг йирик инвесторлардан бири экани таъкидланди. Инвестициялар ҳажми 10 миллиард долларга етмоқда.
Хусусан, 8 миллиард куб метрдан ортиқ табиий газни қайта ишлаш қувватига эга Қандим газни қайта ишлаш заводи фаолият юритмоқда. Ҳаузак ва Шоди конлари, Жануби-ғарбий Ҳисордаги конлар ўзлаштирилмоқда. Муҳим гуманитар дастурлар амалга оширилмоқда.
Суҳбат чоғида пандемия оқибатларини енгиб ўтиш ва қўшма лойиҳаларни амалга ошириш масалаларига алоҳида эътибор қаратилди.
Қўшма лойиҳаларнинг самарадорлигини ошириш ва «Лукойл» компанияси билан стратегик ҳамкорликни кенгайтиришга қаратилган идоралараро ишчи гуруҳ тузиш ва «йўл харитаси»ни қабул қилишга келишиб олинди.
Бундан аввал Шавкат Мирзиёев Қашқадарёда амалга ошириладиган инвестиция лойиҳалари тақдимоти билан танишгани, Қосим-Жўмарт Тўқаев Олмаота яқинидаги авиаҳалокат қурбонларига таъзия билдиргани учун Шавкат Мирзиёевга миннатдорлик билдиргани ҳамда Шавкат Мирзиёев Германия канцлери Ангела Меркель билан видеоанжуман шаклида музокара ўтказгани ҳақида хабар берилганди.
Изоҳ (0)