2021 йилнинг январида АҚШ ҳукумати Xiaomi компанияси «қора рўйхат»га киритилгани тўғрисида хабар берилганди. Бу америкаликларга ушбу компания улушларини сотиб олиш ёки унга сармоя киритишни тақиқлайди. Hi-Tech.Mail.ru’нинг ёзишича, тақиқ ноябрь ойида кучга кириши керак бўлган, бироқ компания суд орқали уни бекор қилишга эришган.
Мазкур хабардан сўнг Xiaomi зудлик билан Колумбия округи федерал судига мурожаат қилган. Компаниянинг таъкидлашича, унинг ҳукумат ва Хитой ҳарбийларига ҳеч қандай алоқаси йўқ.
АҚШ округ судьяси Рудолф Контрерас Xiaomi’нинг даъвосини қаноатлантирган ва вақтинча тақиқни бекор қилган. Унинг сўзларига кўра, компанияда мазкур ишни ҳеч қандай зарарсиз ютиб чиқиш борасида кўплаб имкониятлар мавжуд. Тақиқ бекор қилиниши билан компания акциялари 10 фоизга қимматлашиб кетган.
АҚШ ҳукумати 1999 йилдаги қонунга кўра мазкур тақиқни жорий этганди. Унга кўра, мамлакат Мудофаа вазирлиги Хитой ҳарбийларига боғлиқ компаниялар рўйхатини тақдим этиши керак. Ҳозирга қадар америкаликлар томонидан Xiaomi’нинг ҳарбийларга тегишли эканлиги ёки улар томонидан бошқарилишига оид ҳеч қандай далиллар келтирилмаган.
Xiaomi айни вақтда дунё бўйича энг кўп смартфонлари сотилаётган компаниялар орасида 3-ўринда кетмоқда. АҚШда мазкур компания смартфонлари расман сотилмайди, фақатгина «ақлли» уйлар учун айрим товарлар ва ташқи аккумуляторлар каби майда нарсаларни харид қилиш мумкин.
Эслатиб ўтамиз, 2020 йилнинг июль ойида АҚШ Huawei ва Хитойнинг бошқа технологик компаниялари учун виза чекловларини жорий қилган эди. Давлат департаментининг маълум қилишича, бу компаниялар инсон ҳуқуқларининг бузилишида иштирок этаётган мамлакатлар расмийларига ёрдам кўрсатмоқда.
Изоҳ (0)