Beeline Uzbekistan bosh direktori Sergey Afonin egallab turgan lavozimidan ketishga va o‘z karyera yo‘lini VEON kompaniyasi guruhidan tashqarida davom ettirishga qaror qildi. Bu haqda kompaniya matbuot xizmatiga tayanib, Spot xabar berdi.
Foto: Beeline Uzbekistan
Afonin bosh direktorlikdan ketishini oilaviy sharoiti va global pandemiya davrida safarlarning cheklangani bilan izohlagan.
“Afonin rahbarligi ostida bir qator yirik va strategik jihatdan muhim tashabbuslar muvaffaqiyatli ishga tushirildi va amalga oshirildi, xususan, ko‘plab yangi tarif hamda xizmatlar joriy etildi. 2020-yilning so‘nggi 10 oyining o‘zida butun respublika bo‘ylab 2000 dan ortiq bazaviy stansiyalar qurildi va aloqa mamlakatning eng chekka burchaklarida ham ishlay boshladi”, — deyiladi matbuot xizmati xabarida.
Ayni vaqtda VEON kompaniyasi Beeline Uzbekistan bosh direktorligi lavozimiga yangi nomzodni qidirmoqda. Ta’kidlanishicha, munosib nomzodni topish, shuningdek, o‘zidan keyingi kompaniya yetakchisiga vazifalarni tushuntirish jarayonida Sergey Afoninning shaxsan o‘zi ham ishtirok etadi.
Eslatib o‘tamiz, VEON Group Sergey Afoninni 2019-yil 1-martdan Beeline Uzbekistan bosh direktori lavozimiga tayinlagan edi. Bunga qadar u Beeline Russia Janubiy mintaqaviy filiali direktori, Rossiyadagi yirik FMCG-kompaniya tijoriy direktori lavozimlarida ishlagan.
