Ёшлар ишлари агентлиги ва Мудофаага кўмаклашувчи «Ватанпарвар» ташкилоти эҳтиёжманд оилалар ёшларини автомактабларда бепул ўқитиш тўғрисида меморандум имзолади, деб хабар берди «Халқ сўзи Online».
Хайрия акцияси доирасида «ёшлар дафтари»дан ўрин олган 56 нафар йигит (ҳар бир вилоятдан 4 тадан) «Ватанпарвар» автомактабларида бепул ўқиш учун сертификат олган.
«Ватанпарар» ташкилоти «Gazeta.uz»га маълум қилишича, 1 апрелдан «темир», «ёшлар» ва «аёллар» дафтарларига киритилган эҳтиёжманд оилалар ёшлари ҳам «Ватанпарвар »автомактабларида B ва C тоифалари бўйича ҳайдовчилик гувоҳномаларини олиш учун бепул ўқишлари мумкин бўлади. Ушбу масалада ташкилот Бандлик ва меҳнат муносабатлари вазирлиги ва унинг ҳудудий бошқармалари билан ҳамкорлик қилади, улар фуқароларни «дафтар»лардан автомактабларга юборади.
Бундан ташқари, август ойида «Ватанпарвар» техник хизматлар кўрсатиш (чилангар, пайвандчи ва бошқалар) учун бепул курсларни, декабрда — махсус транспорт ҳайдовчиларини тайёрлаш бўйича бешта ҳудудий ўқув марказларини ишга туширади.
Ёшлар ишлари агентлиги ушбу ташаббус ҳайдовчилар талаб қилинадиган автобазаларда, автобус паркларида ва бошқаларда ёшларни ишга жойлаштириш орқали уларнинг бандлигини таъминлаш учун амалга оширилаётганини таъкидлаган.
Эслатиб ўтамиз, 2021 йилнинг январида Президент Шавкат Мирзиёев Мудофаага кўмаклашувчи «Ватанпарвар» ташкилотини 210 та ҳудудий бўлинмаси билан биргаликда Мудофаа вазирлиги тизимига ўтказиш бўйича кўрсатма берганди.
Изоҳ (0)