Ўзбекистон мусулмонлари идораси интернет фойдаланувчилари берган овозлар асосида «Йил танлови – 2020» ғолибларини эълон қилди ва 10 март куни уларни тақдирлаш маросими бўлиб ўтди, деб хабар бермоқда идора матбуот хизмати.
Танлов натижаларига кўра, «Энг обод масжид» ва «Йил имоми» йўналишлари бўйича энг кўп овоз олган номзодлар ғолиб деб топилган.
2020 йилда Ўзбекистоннинг энг яхши имоми дея Андижон вилояти Балиқчи туманидаги «Оққўрғон» жоме масжиди имом-хатиби Рустамжон Ҳамидов эътироф этилди. 2019 йилда Тошкент шаҳри «Доруссалом» жоме масжиди имом-хатиби Муҳаммадраҳим Абдуқодиров, 2018 йилда эса Шайхонтоҳурдаги «Оқилон» масжиди имом-хатиби Исомиддин Аҳроров Ўзбекистонда «Йил имоми» деб топилган.
«Йил имоми» йўналишида 2-ўрин Тошкент шаҳар Олмазор туманидаги «Имом Термизий» жоме масжиди имом-хатиби Исҳоқжон Бегматовга насиб этди.
Ушбу йўналишдаги 3-ўринга Наманган вилояти Тўрақўрғон туманидаги «Қўчқор ота» жоме масжиди имом-хатиби Муҳаммаджон Солиев лойиқ топилди.
«Энг обод масжид» йўналишида Нукус шаҳридаги «Имом Эшон Муҳаммад» жоме масжиди 1-ўринни эгаллади.
Бу йўналишда 2-ўринга Хоразм вилояти Урганч шаҳридаги «Охун бобо» жоме масжиди лойиқ кўрилди.
Андижон вилояти Қўрғонтепа туманидаги «Рамазон қори» жоме масжиди 3-ўринга қўлга киритди.
Ғолиб ва совриндорларга танловнинг махсус дипломи ва статуэткалари ҳамда қимматбаҳо совғалар ва пул мукофотлари топширилган.
Изоҳ (0)