3 март куни Шавкат Мирзиёев «Зулфия номидаги Давлат мукофоти билан тақдирлаш тўғрисида»ги қарорни имзолаган эди. Президент 8 март–Халқаро хотин-қизлар куни муносабати Tashkent City Конгресс-ҳоллда ушбу мукофотларни тантанали равишда эгаларига топширди.
Тадбирда давлат раҳбари «Зулфия» мукофотининг энг ёш соҳибаси, Қорақалпоғистон Республикаси Бўзатов туманидаги 1-умумий ўрта таълим мактабининг 8-синф ўқувчиси Гулсанем Ўразбаевага ҳам мукофотни топширган.
Президент матбуот хизмати томонидан тайёрланган «Махсус ракурс» кўрсатувининг навбатдаги сонидан кўриш мумкинки, ўтган йилнинг октябрь ойида Тошкент IТ-паркига ташрифи чоғида давлат раҳбари Гулсанем Ўразбаева билан видеоконференция орқали суҳбат қилиб, у билан албатта кўришишни ваъда қилган.
«Сиз билан, албатта учрашаман. Мен бунга ваъда бераман», деган эди Президент Гулсенемнинг сўзларидан хурсанд бўлиб.
Президент нафақат ваъдасининг устидан чиққан, балки ёш спортчи лойиқ кўрилган мукофотни шахсан ўзи топширган.
Аввалроқ Президент Шавкат Мирзиёев 8 март—Халқаро хотин-қизлар куни муносабати билан тантанали маросимда актриса Юлдуз Ражабова иштирокидаги фильмни эътироф этиб, уни ижодни сусайтирмасликка чақиргани тўғрисида хабар берилганди.
Изоҳ (0)