Тошкент вилояти Бўстонлиқ туманида бошқа фуқаронинг 15 сотих ерини фирибгарлик йўли билан сотмоқчи бўлган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, департаментнинг Бўстонлиқ туман бўлими томонидан фирибгарлик ҳолатининг олдини олиш бўйича тезкор тадбир ўтказилган. Тадбир давомида А.Х. исмли шахс ва шериклари фуқаро У.нинг ишончига кириб, бошқа бир фуқарога тегишли бўлган Сижжак қишлоғидаги 15 сотих бўш ерни унинг номига Бўстонлиқ тумани кадастр бўлимида ишловчи танишлари орқали расмийлаштириб бериш эвазига 33 минг долларни фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан А.Х. ва шерикларига нисбатан Жиноят кодексининг 168-моддаси (фирибгарлик) ва 28-, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Чинозда тадбиркорга 12 800 доллар эвазига 1,3 гектар ер ажратиб беришни ваъда қилган туман ҳокимлиги ходими ушлангани, Тошкент вилоятида ҳоким қарорини сохталаштириб, аслида йўқ бўлган уйларни 100 минг долларга сотишга уринган шахслар қўлга олингани тўғрисида хабар берилганди.
Изоҳ (0)