Janubiy Koreya hukumati COVID-19’ga qarshi AstraZeneca vaksinasi bilan emlangan ikki kishining o‘limi yuzasidan tergov boshladi. Bu haqda Yonhap nashri xabar berdi.
Ta’kidlanishicha, Seulning shimoli-g‘arbiy chegarasi yaqinidagi Goyan hududida joylashgan kasalxonada bir qancha kasalliklarga chalingan 50 yoshli bemor ushbu vaksina bilan bir kun oldin emlanganidan so‘ng 3-mart kuni vafot etdi. Tibbiyot xodimlari erkakda yurak yetishmovchiligi alomatlari, shuningdek, shu kuni ertalab kuchaygan nafas qisishi holatini qayd etdi.
Serebrovaskulyar kasalligiga chalingan yana bir 63 yoshli bemor Kyongido provinsiyasining Pxyontxek shahridagi kasalxonaga yotqizilgan edi. 27-fevral kuni u AstraZeneca bilan emlangan, bir kundan keyin unda yuqori harorat va butun tanasi bo‘ylab kuchli og‘riq kuzatilgan. 2-mart kuni bemor boshqa kasalxonaga ko‘chirilgan va u yerda 3-mart kuni pnevmoniya tufayli vafot etgan.
Ayni paytda shifokorlar ikkala bemorning o‘limi emlash ishlari bilan qanchalik bog‘liqligini tekshirmoqda.
Ma’lumot uchun, 2-mart kuni Kanada Milliy maslahat qo‘mitasi AstraZeneca vaksinasini 65 yoshdan oshganlarga tavsiya qilmasligini ma’lum qildi. Bunday qarorga ushbu preparatning mazkur yosh guruhi uchun samarador ekani to‘g‘risida ma’lumotlar cheklangani sabab bo‘lgan.
Xuddi shu kuni Ukrainaning sobiq prezidenti Pyotr Poroshenko mamlakatga fevral oyi oxirida yetkazib berilgan AstraZeneca preparati, shifokorlarning fikriga ko‘ra, shubhali sifatga ega ekanligini aytdi. Vaksina bilan birinchi bo‘lib shifokorlar emlanadi. Biroq ularning aksariyati preparatga ishonch yo‘qligi sababli emlanishdan bosh tortmoqda.
Avvalroq Gretsiya COVID-19’ga qarshi emlanganlarda jiddiy asoratlar kuzatilgani va 85 yoshli erkak COVID-19’ga qarshi emlanganidan keyin vafot etgani haqida xabar berilgandi. Ta’kidlanishicha, emlashdan sakkiz daqiqa o‘tgach, erkak hushidan ketgan. Unga yurak-o‘pka reanimatsiyasi (massaji) bilan birinchi yordam berilganidan so‘ng besh daqiqa davomida o‘ziga kelgan, ammo yana hushidan ketgan.
Norvegiyada esa Amerikaning Pfizer kompaniyasi va uning Germaniyadagi sherigi BioNTech tomonidan ishlab chiqilgan koronavirusga qarshi vaksina bilan emlangan ikki kishi vafot etgan. Norvegiya dori vositalari agentligi ma’lumotlariga ko‘ra, ikkala qurbon ham qariyalar uylaridan birida yashagan.
Shuningdek, AQShda 21-yanvar kuni COVID-19’ga qarshi emlangan bemor oradan bir necha soat o‘tib vafot etgani haqida xabar berilgandi. Uning vafoti yuzasidan huquqni muhofaza qilish organlari tekshiruv boshlagan.
Izoh (0)