Honda компанияси янги хавфсизлик тизими жамланмаси — Honda Sensing Elite’ни тақдим этди. Унинг ичидан Япония ҳукумати томонидан расман тасдиқланган учинчи даражали автопилот — Traffic Jam Pilot функцияси ҳам ўрин олган. Замонавий жамланмадан биринчи бўлиб Legend Hybrid EХ бизнес-седани «фойдаланмоқда», деб ёзади Motor.
Elite приставкасига эга Honda Sensing жамланмаси хавфсизлик тизимининг навбатдаги эволюция босқичи ҳисобланади. Ундаги асосий янгилик — Traffic Jam Pilot функцияси бўлиб, у учинчи даражали автоматлаштирилган талабларга жавоб беради ва айрим вазиятларда, масалан, автомагистраллардаги тирбандликларда бошқарувни ўз қўлига ола олади. Ўз ишида у юқори тиниқликдаги уч ўлчамли харитадан, сунъий йўлдош навигацияси, кузовдаги датчик ва камералардан фойдаланади, шунингдек, салондаги камера орқали ҳайдовчини кузатади.
Elite жамланмасининг бир қисми Hands-off функцияси («қўлсиз») ҳисобланиб, у фаол круиз-назорат вақтида рулни қўлга олиш, шунингдек, «тирбандликлар» учун автопилотдан фойдаланиш имконини беради. Ҳайдовчи бурилиш ҳақида ишора берувчи чироқларни ёққан тақдирда ҳам, ёки олдинда кетаётган транспорт воситаси жуда секин ҳаракатланса, автомобиль мустақил равишда ҳаракатга мослаша олади.
Агар ҳайдовчи тизимнинг бир нечта сигналлари, жумладан, хавфсизлик камаридаги вибрацияга қарамай рулни ушламаса, у тезликни камайтириб, автомобилни йўл четида тўхтатади.
Хавфсизлик комплексини текшириш учун Honda 10 миллионга яқин эҳтимолий йўл транспорт ҳодисаларини моделлаштирган ва 1,3 миллион километр юриб, ҳақиқий тестларни ўтказган. Бундан ташқари, Sensing Elite қурилмалардан бирининг кутилмаганда ишдан чиқишига қарши имкониятга эга — у ҳолда тизим қўшимча хатарларсиз ўз ишини давом эттира олади.
Японияда илғор автопилотга эга Honda Legend Hybrid EХ седанлари 5 мартдан лизингга берила бошланади. Автомобильлар сотувга қачон чиқиши ҳозирча номаълум.
Аввалроқ Honda компанияси сирли модель — келажакдаги машиналарни ёдга солувчи футуристик концепт-кар учун патент олгани тўғрисида хабар берилганди.
Изоҳ (0)