БМТнинг Наркотик ва жиноятчиликка қарши кураш бўйича бошқармаси (UNODC)нинг Марказий Осиёдаги минтақавий ваколатхонаси Ўзбекистонда янги ташкил этилган Чегара алоқа бўлинмалари ва идоралараро мобил гуруҳлар учун ускуналар тақдим қилди. Бу ҳақда «Gazeta.uz» хабар бермоқда.
Маълум қилинишича, Вазирлар Маҳкамаси ҳузуридаги Гиёҳванд моддаларни назорат қилиш миллий ахборот-таҳлил маркази, Давлат божхона қўмитаси, Давлат хавфсизлик хизмати, Ички ишлар вазирлиги, ИИВ Чегара қўшинлари ва Бош прокуратура ҳузуридаги Иқтисодий жиноятларга қарши курашиш департаментига 674 минг долларлик 14 та автомашина, стратегик, тактик ускуналар ва офис техникалари тақдим қилинган.
Ускуналар UNODC ва Япония ҳукумати ўртасидаги 2020 йил февраль ойида имзоланган Марказий Осиёда гиёҳванд моддалар савдосига қарши курашга қаратилган 6,8 миллион долларлик грант шартномаси асосида берилган.
Ушбу маблағларга Марказий Осиёдаги Чегара алоқа бўлинмалари ва Ўзбекистондаги Идоралараро мобил гуруҳларни ташкил этиш кўзда тутилганди.
Ускуналарни топшириш маросимида UNODC’нинг Марказий Осиё бўйича минтақавий вакили Ашита Миттал, Япониянинг Ўзбекистондаги элчиси Ёшинори Фудзияма, Вазирлар Маҳкамаси ҳузуридаги Наркотик моддаларни назорат қилиш Миллий ахборот-таҳлил маркази директори Олим Нарзуллаев ва бошқалар иштирок этди.
Аввалроқ Тошкент шаҳар ҳокимлиги ҳузуридаги ситуацион марказни қўллаб-қувватлаш учун қиймати 500 минг доллардан ортиқ ускуналар Давлат божхона қўмитасига тақдим этилганди. Унинг расмий очилиши яқин орада бўлиб ўтади.
Изоҳ (0)