Самарқандда мактаб ўқувчилари мажбурий меҳнатга жалб қилингани, айбдорлар эса шунчаки ҳайфсан билан қутилиб қолаётгани ҳақида хабар қилинганди. Бандлик ва меҳнат муносабатлари вазирлиги ушбу мақола юзасидан Давлат меҳнат инспекцияси ўрганиш олиб борганини маълум қилди.
Таъкидланишича, ўрганиш давомида Самарқанд вилояти Тойлоқ тумани халқ таълими бўлимига қарашли 13-умумий ўрта таълим мактаби директорининг ўқув ишлари бўйича ўринбосари Нафиса Исматуллаева 2020 йил 5 декабрь куни 5 ва 8-синф ўқувчиларини мактаб ҳудудини ободонлаштириш ишларига жалб қилиб, ҳашар ташкил этганлиги аниқланди.
Натижада 2021 йилнинг 29 январь куни мазкур мактаб директорининг ўқув ишлари бўйича ўринбосари Маъмурий жавобгарлик тўғрисидаги кодекснинг 51-моддаси 2-қисмида (вояга етмаганларни меҳнатга мажбурлаш) назарда тутилган ҳуқуқбузарликни содир этганлиги сабабли базавий ҳисоблаш миқдорининг 70 баробари (15 миллион 610 минг сўм) миқдорида жаримага тортилди.
Маълумот учун, 12 февралдан бошлаб Ўзбекистонда болаларни мажбурий меҳнатга жалб қилганлар тўғридан-тўғри жиноий жавобгарликка тортилиши белгиланди.
Бундан аввал Cotton Campaign Ўзбекистон 2020 йилги пахта теримида мажбурий меҳнатга барҳам беришда «сезиларли ютуқлар»га эришганини маълум қилгани, Ўзбекистонда 2020 йилги пахта мавсумида меҳнат қонунчилигини бузган 174 нафар мансабдор 745,7 миллион сўм жаримага тортилгани ҳамда Ўзбекистонда вояга етмаганларни мажбурий меҳнатга жалб қилганлик учун 5 йилгача қамоқ жазосини белгилаш таклиф қилингани ҳақида хабар берилганди.
Изоҳ (0)