Ҳиндистон бош вазири Нарендра Моди коронавирусга қарши мамлакатда ишлаб чиқарилган COVAXIN вакцинасининг биринчи дозасини олди. Бу ҳақда «Интерфакс» хабар берди.
«COVID-19’га қарши вакцинанинг биринчи дозасини қабул қилдим. (...) Мен эмланиш ҳуқуқи бўлган барчага мурожаат қиляпман. Келинг, Ҳиндистонни коронавирусдан холи мамлакатга айлантирайлик!», — деб ёзди Моди Twitter тармоғига вакцина билан эмланаётгани тасвирланган суратни жойлаб.
Ҳиндистонда 1 март, душанба кунидан вакцинациянинг иккинчи тўлқини бошланди. Вакцинация доирасида 45 ёш ва ундан юқори бўлганлар ва бирор касаллик билан оғриганлар эмланиш ҳуқуқига эга.
Биринчи навбатда 12 миллиондан ортиқ бўлган тиббиёт ходими эмланди. Хабар берилишича, уларнинг кўпчилиги маҳаллий COVAXIN вакцинаси билан эмас, AstraZeneca препарати билан эмланишни афзал кўрган.
«Бунинг ҳаммаси COVAXIN’нинг фақат экспериментал вакцина бўлгани ва синовларнинг учинчи босқичи якунланмагани масаласидаги дастлабки мунозараларга боғлиқ», — деди Махараштра штати ҳукуматининг вакцинация стратегияси бўйича маслаҳатчиси Субхаш Салунхе.
Bharat Biotech вакцина ишлаб чиқарувчи компанияси мутахассисининг таъкидлашича, тез орада 26 минг кўнггилли билан ўтказилган синов натижалари эълон қилинади.
Жонс Ҳопкинс университети маълумотларига кўра, Ҳиндистон коронавирус билан зарарланиш ҳолатлари бўйича дунёда иккинчи ўринни эгаллаб турибди. Пандемия бошидан буён мамлакатда 11 110 152 та ҳолат қайд этилди, 157 минг киши вирус қурбонига айланди, 10 миллиондан ортиғи соғайди.
Аввалроқ Ҳиндистонда коронавируснинг «африкача» ва «бразилияча» штаммлари аниқлангани ҳақида хабар берилган эди.
Изоҳ (0)