Сардоба сув омборининг ҳозирги ҳолати ва юзага келган техноген офатнинг сабабларини ўрганиш, унинг келиб чиқиш ҳолатлари қайта такрорланишининг олдини олиш мақсадида Москва давлат қурилиш университети мутахассислари жалб қилинган. Бу ҳақда 1 март куни Қурилиш вазирлигида ўтказилган матбуот анжуманида сўз юритилди, дея хабар бермоқда «Дарё» мухбири.
Тадбирда қурилиш вазири Ботир Зокиров мазкур жараёнга нима учун айнан россиялик мутахассислар жалб қилинганига изоҳ берди.
«Москва давлат қурилиш университети мутахассисларини бу масалага жалб қилганимизнинг сабаби шуки, уларда катта тажриба бор. Ушбу олий ўқув юрти мутахассислари шунга ўхшаш ўнга яқин масалаларни ўрганиб, ўз хулосаларини беришган. Шунинг учун ҳам биз МДҚУ вакилларини таклиф қилдик. Улар холис ташкилот, ҳеч кимга бўйсунмайди. Университет шартномани вазирлигимиз билан тузган.
Россиялик мутахассислар биринчи босқичда Сардоба талафоти сабабларини аниқласа, иккинчи босқичда мавжуд муаммоларни бартараф қилиш бўйича лойиҳа таклифларини тайёрлаб беради.
Шуни алоҳида қайд этиш керакки, Москва давлат қурилиш университети мутахассислари ўрганиш ишларини якунлаганидан сўнг, уларнинг хулосаларини ҳам текшириш учун Италия, Туркия, Корея сингари бешта давлатдан мутахассислар жалб қилинади. Биз улар билан музокаралар олиб борганмиз. Улар Сардоба бўйича талафот оқибатларидан ташқари, лойиҳавий ечимларига ҳам хулоса тақдим қилишади. Улар умумий хулосаларни беради. Сув омборни қайта тиклаш ишлари ҳеч қачон битта ташкилот хулосаси билан амалга оширилмайди», — деди қурилиш вазири.
Изоҳ (0)