АҚШ фуқаролари аҳолини эмлаш жадвалидаги режадан бир неча ҳафта олдинроқ 50 миллион дозада COVID-19 вакцинасини қабул қилди. Бу ҳақда мамлакат президенти Жо Байден маълум қилди, деб ёзмоқда «Интерфакс».
«Бугун мен аллақачон йўлнинг ярмига келганимиз ҳақида хабар бергани келдим. Президентлик фаолиятини бошлаганимдан бери 37 кун ичида эллик миллион аҳоли эмланди. Режа ҳатто сўнгги кунлардаги совуқ бўронлар оқибатида юз берган кўнгилсизликларга қарамай, муддатидан бир неча ҳафта олдинроқ бажарилди», — деди Байден.
Байден президентлик лавозимига киришган пайт биринчи 100 кун ичида 100 миллион америкаликни эмлашни мақсад қилган эди.
Унинг таъкидлашича, қанча кўп одам эмланса, пандемияни шунча тезроқ енгилади.
«Бутун Америка аҳолисини эмлаш бўйича бирор аниқ режа тақдим этмаган аввалги маъмуриятдан қолган бетартибликларга қарамай, биз тўғри йўналишда ҳаракат қилмоқдамиз», — деди АҚШ президенти.
Шунга қарамай, Байден америкаликларни бўшашмасликка чақирди.
«Вируснинг янги турлари пайдо бўлиши билан касалликни юқтириш ва касалхонага ётқизишлар такрорланиши мумкин. Ҳозир эътиборсизлик қиладиган вақт эмас. Қўллар тозалигини назорат қилиб, масофа сақлашимиз ва ниқоб тақишимиз керак», — деди у.
Аввалроқ Байден мамлакатда COVID-19 билан боғлиқ фавқулодда ҳолат режими узайтирилганини маълум қилганди.
Эслатиб ўтамиз, 23 февраль куни Қўшма Штатларда коронавирус қурбонлари сони 500 минг кишидан ошди. Шу муносабат билан Байден вафот этганлар учун мотам белгиси сифатида бутун мамлакат бўйлаб беш кунга байроқларни туширишни буюрди.
АҚШда коронавирусдан вафот этганлар сони Биринчи ва Иккинчи жаҳон уруши ҳамда Вьетнам уруши пайтида ҳалок бўлганларнинг умумий сонидан ошиб кетган.
The New York Times 21 февраль кунги сонининг биринчи саҳифасида коронавирус қурбонлари сонини англатувчи 500 мингта нуқтадан иборат график тасвирини чоп этди. Тасвир қурбонлар сонининг ўсиш «тезлигини» акс эттиради.
Изоҳ (0)