Бухорода фуқарони тиббиёт ходими сифатида ишга жойлаштиришни ваъда қилиб, эвазига ундан 700 доллар пора талаб қилган катта ҳамшира қўлга олинди. Ҳолат ДХХ ҳамда Иқтисодий жиноятларга қарши курашиш департаментининг вилоят бошқармаси ходимлари ҳамкорлигида ўтказилган тадбирда фош этилган, дея хабар берди «Дарё» мухбири.
Таъкидланишича, Бухоро шаҳрида яшовчи фуқаро С.У. ишга жойлашиш мақсадида вилоят фтизиатрия ва пулмонология маркази хирургия бўлимига мурожаат қилган. Мазкур бўлим катта ҳамшираси З.А. фуқарони алдаб, марказнинг мансабдор шахслари орқали тиббиёт ходими сифатида ишга жойлаштиришини айтиб, эвазига ундан 700 доллар талаб қилган. Бунча миқдордаги маблағга эга бўлмаган фуқаро С.У. ҳолат юзасидан ҳуқуқ-тартибот идораларига ариза билан мурожаат қилишга мажбур бўлган.
Ариза юзасидан департаментнинг Бухоро шаҳар бўлими ҳамда ДХХ вилоят бошқармаси ходимлари томонидан тезкор тадбир ўтказилган. Вилоят фтизиатрия ва пулмонология маркази хирургия бўлими катта ҳамшираси З.А. фуқародан ўз хизмат хонасида 700 долларни пора тариқасида олаётган вақтда қўлга олинган.
Мазкур ҳолат бўйича катта ҳамширанинг ҳаракатларида фирибгарлик ва пора беришга ундаш жинояти аломатлари мавжудлиги инобатга олиниб, жиноят иши қўзғатиш учун тўпланган ҳужжатлар Бухоро шаҳар прокуратурасига юборилган. Кейинчалик эса катта ҳамширага нисбатан Жиноят кодексининг 168-моддаси 1-қисми (фирибгарлик) ва 28, 211-моддаси 1-қисми (Пора бериш) билан жиноят иши қўзғатилган. Айни пайтда дастлабки тергов ҳаракатлари олиб борилмоқда.
Изоҳ (0)