«Ювентус»дан ПСЖгача. Серхио Рамоснинг кейинги манзили қаер бўлади?

Кундан кунга Серхио Рамоснинг «Сантьяго Бернабеу»ни тарк этиши ва бошқа жамоага ўтиб кетиши мумкинлиги ҳақидаги хабарлар тобора кўпайиб бормоқда. «Қаймоқранглилар»да музокара ўтказиш учун атиги беш ой вақт қолмоқда, янги шартномадан эса ҳамон дарак йўқ.

2020 йилнинг ноябрь ойидаёқ Рамосга инглиз клублари томонидан қизиқиш билдирилгани ва уларнинг бу даражадаги футболчини ўз сафига бепул қўшиб олишдан фақат хурсанд бўлиши айтилганди. Гарчи «Реал» мухлислари унинг кетишини истамаса-да, ҳаммаси унинг жамоани тарк этишига қараб кетмоқда. Шундай экан, испанияликни келажакда нима кутаётгани ҳақида ўйлашнинг вақти етди. Қуйида айнан Серхио Рамосни келажакда нималар кутаётганига атрофлича тўхталиб ўтилади.

MLS

Рамоснинг «қироллик клуби» билан шартномаси якунига етганида у 35 ёшда бўлади. Тўғри, бу ҳали ҳаммаси тугади дегани эмас, аммо кўпчилик айнан шу ёшда ўзининг сўнгги шов-шувли трансфери ҳақида ўйлашни бошлайди. Ва шунда аксарият юлдузлар нисбатан ўйнаш осон ва енгилроқ бўлган Америка лигасини танлайди. Бунинг устига у ердаги маош масаласи ҳам Европадан қолишмайди. Майами каби шаҳарларнинг бирида ўзига тўғри келадиган жамоани топиш — идеал вариант эмасми?

Умуман олганда кўп жиҳатлар мос келмоқда, аммо Рамоснинг бунга рози бўлмаслиги аниқ, чунки у ҳар доим жангчи бўлиб келган. У совринларга ташна, доимо ниманидир исботлаши керак. Шу сабабли унинг океан ортига йўл олиш варианти эҳтимоли жуда пастдир.

«Манчестер Сити»

Анчайин таниқли бўлган ва юқори маош талаб қиладиган ҳимоячи ўзига янги клуб қидирмоқда? Унда нега «Манчестер Сити» эсланмаслиги керак? Аммо бу сафар ҳаммаси аввалгидек эмас.

«Сити»да бугунга келиб, ҳимоя борасида муаммолар бартараф этилгандек, бундай дейишга сабаб Рубен Диаш ва Жон Стоунз тандеми жуда яхши ўйин кўрсатмоқда. Шунингдек, Аймерик Ляпортни ҳам унутмаслик керак. Ушбу ҳолатда Пеп Гвардиола Рамосга таркибдан жой топиб беришда қийналиши аниқ.

«Тоттенҳэм»

Англиянинг бошқа бир клуби «Тоттенҳэм» эса янги ҳимоячига эҳтиёж сезмоқда. Моуриньо жамоага чемпионлик амбицияларини олиб келган бўлса ҳам ҳозирча «шпорлар»нинг ишлари унчалик яхши эмас. Жамоа ҳужумда яхши ўйин кўрсатаётган бир пайтда ҳимояда Рамосдек ўйинчининг бўлиши фақат фойдага ишлаган бўларди.

Бунинг устига Жозе ва Рамос аввал ҳам бирга ишлаган. Яқинда Мадрид клубидан «Тоттенҳэм»га йўл олган Серхио Регилоннинг Рамос билан телефон орқали боғлангани ва эҳтимолий трансферни муҳокама қилгани ҳақида маълумотлар пайдо бўлганига қарамай, ҳозирча бундай келишувнинг амалга ошишига ишониш қийин.

«Ювентус»

Криштиану Роналду «Реал»ни тарк этганида ҳамма пойтахт клубининг қоқилишини кутган эди, аммо жамоа Рамос бошчилигида чемпионликни қўлга киритишга муваффақ бўлди.

«Ювентус» эса доимо ўзининг маҳоратли трансферлари, асосан текинга қўлга киритилган юлдуз футболчилари билан танилган — бир пайтлар Пол Погба, Аарон Рэмзи, Адриан Рабьо ва Даниел Алвес каби номдор ўйинчилар Туринга эркин агент сифатида кўчиб ўтган. Юқоридаги клубларга қараганда Рамоснинг айнан туринликлар сафига ўтиш эҳтимоли юқоридир. Бунинг устига «кекса синьора» узоқ йиллардан бери Чемпионлар Лигасида ғолиб чиқишни истагида ёнмоқда. Рамос эса бу борада яхшигина тажрибага эга.

«Реал Мадрид»

Ҳа, Серхио Мадридда қолиши ҳам мумкин. Очиғини айтганда, агар кимнидир Испания футбол қироли деб аташ мумкин бўлса, шубҳасиз, бу Серхио Рамосдир. Рамос ҳар доим ўз клубини яхши кўрган ва жамоа ҳам ўз даврининг энг яхши ҳимоячиларидан бирини қадрлаган ва ҳурмат қилган. Агар Серхио қолса, бундан ҳамма ғалаба қозонади. Муаммо? Пандемия сабабли томонлар бир тўхтамга кела олмаяпти. Серхио ўзи муносиб бўлган маошли шартнома талаб қилаётган бўлса, клуб раҳбарияти инқирозлар даврида бунга қурби етмаслигини айтмоқда. Аммо барибир муросага келиш мумкин ва ҳозирда миллионлаб мухлислар шунга умид боғламоқда.

«Манчестер Юнайтед»

Рамос бундан олдин ҳам шартномасиз қолиб кетишига бир бахя қолганида айнан «Манчестер Юнайтед» уни ўз сафига қўшиб олиш учун асосий даъвогар ҳисобланганди.

Инглиз клубининг ўша пайтдаги мураббийи Луи ван Гал испаниялик футболчини кўндиришга уриниб кўрганди, ҳатто ўшанда ўйинчининг ўзи ҳам «қизил иблислар» либосини кийишни хоҳлаганлигини тан олганди.

Ҳозир ҳам Рамоснинг Манчестерга йўл олиш эҳтимоли анча юқоридир. «Юнайтед» мудофаада етакчи футболчига жуда муҳтож . Рамоснинг эса у ерда даромадли шартнома олиши ва асосий таркиб ўйинчиси бўлишига ҳеч қандай шубҳа йўқ.

ПСЖ

«Манчестер Сити» сингари ПСЖ атрофида ҳам доимо шов-шувли келишувлар ҳақида гап борган. Ҳозирги кунда француз мудофаасида ҳаммаси ҳам яхши кетмаяпти, шу сабабли Рамос варианти эҳтимолдан холи эмас.

Ўтган мавсумда парижликлар Тиаго Сильвани қўйиб юборди, Рамос эса унга ҳар томонлама ўхшаши ҳеч кимга сир эмас. Шунингдек, Серхио кўп маротаба Чемпионлар Лигасида ғалаба қозонган. Айнан Рамоснинг келиши ПСЖга узоқ вақтдан бери кутилаётган совринни тақдим этиши мумкин. Юқоридагилар шунчаки эҳтимоллар назарияси эди, воқеалар ривожи қандай якунланишини эса фақат вақт кўрсатади.