Ўзбекистонлик ярим ҳимоячи Остон Ўруновнинг «Спартак»даги саргузаштлари якунига етди, 19 февраль куни Москва клуби уни Россия Премьер Лигаси қайдномасидан чиқариб ташлади ва собиқ клуби «Уфа»га ижарага бериб юборди. 2020 йилнинг ёзида сотиб олинган Остон пойтахтликлар сафида деярли ҳеч нарсаси билан эсда қолмади.
Остон Ўрунов «Уфа» бош директори Шамил Газизов «Спартак»ка ўтганидан бир ой ўтиб, Москва клубига йўл олди. Газизов «Уфа»да Ўруновни ўз пулларига сотиб олганди.
«Газизов ўзи пул топиб, Остонни сотиб олди. Биз Ўруновни қимматроқ нархда сотишимиз ҳам мумкин эди, аммо Газизов уни керакли деб билган жойига сотди. Трансфер тарихини билган ҳолда эътироз билдиришга маънавий ҳуқуқим йўқ эди. Шамил Ўруновни ўзи топди, Россияга ўзи олиб келди, ўз пул тўлади», — деганди «Уфа» раҳбари Ростислав Мурзагулов.
Ўрунов Бошқирдистонда жуда ажойиб футбол намойиш қилди деб айтиш қийин: олти ой ичида 10 та учрашув ўтказиб, бирорта ҳам самарали ҳаракатни амалга оширмади, бироқ ажойиб дриблинги билан ёдда қолганди.
«Спартак» Ўрунов учун миллионга еврога яқин пул тўлаган (олти ой олдин «Уфа», аниқроғи Газизов 150 минг евро сарфлаганди).
«Кетишимдан олдин мен «Уфа» раҳбарияти билан гаплашдим ва бу йигитни шу миқдорга ўзим билан олиб кетишимни айтдим. Ўшанда бошқа таклифлар йўқ эди. Ва биз келишувга эришдик. Кейинчалик маълум клублардан ҳам таклифлар бўлди, эҳтимол, улар «Спартак»нинг таклифини тўхтатиб қўйиши ҳам мумкин эди. Аммо бизда (клублар ва одамлар ўртасида) келишув бор эди ва бундай нарсаларни ҳурмат қилиш керак», — деганди менежер.
«Спартак»да 35 миллион янги мухлис пайдо бўлди деб айтишимиз мумкин. Бу мамлакатимизнинг бутун аҳолиси», — деганди Ўрунов жасорат билан «Спартак»ка ўтганидан кейиноқ.
Ўрунов ҳали дебют қилмасданоқ можарога аралашиб қолди: у Instagram саҳифасига Gucci ва Louis Vuitton брендларидан қилган қимматбаҳо харидлари («ЦУМ»даги) суратини жойлаштирди. Ўрунов нотўғри иш қилганини тезда тушунди ва суратни ўчириб ташлаганди. Бироқ бу уни танқидлар ёмғиридан қутқара олмади, аксинча, буни янада кучайтирди.
«Спартак» Twitter’да ўзбек тилидаги аккаунтини ҳам ишга туширди, аммо у ердаги сўнгги твит 31 декабрда эълон қилинган ва 35 миллион обуначи ҳам пайдо бўлмади — 500 дан сал кўпроқ кузатувчи.
Ўрунов «Спартак»даги фаолияти давомида асосан захирада ўтирди ва фақатгина икки бор асосий таркибдан жой олди: «Родина»га қарши Кубок баҳсида (шу ўйинда у «Спартак» сафидаги ягона голини урди) ва «Зенит»га қарши ўйинда (майдон марказидаги бошқа футболчиларнинг жароҳати борлиги туфайли). Шундан сўнг у 6 учрашувда атиги 13 дақиқа ўтказди.
Ўзбек футболчисининг «Спартак»даги фаолиятини охирги паллада Сергей Юран ёритиб берди: «Ҳамма унинг кўрсатилганидан 4-5 ёшга катта эканлигини билади. Ўзбекистонда бу каби нарсалар... Умуман олганда, бу сир ҳам эмас. Бу очиқ-ойдин кўриниб турибди», — деганди Сергей Юран.
Натижада, Остонга алоқаси бўлган ҳар бир киши футболчининг ёнини олди. Юраннинг сўзлари эса ўз исботини топмади, Россия футбол иттифоқи эса уни 250 минг рубль миқдорида жаримага тортди.
Аммо бу Ўруновга ёрдам бермади. Газизов клубдан кетганидан кейин футболчи позициясини бутунлай бой берди. 2021 йилнинг 19 февраль куни эса «Спартак» уни «спорт принциплари асосида» РПЛ қайдномасидан чиқариб ташлади ва у кутилганидек «Уфа»га қайтди.
Мавзуга доир: Италиядан Польшагача. Ўзбекистонлик легионер футболчилар қайси давлатларда тўп сурмоқда?
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)