АҚШда ноодатий транспорт воситаси сотувга қўйилди — у худди автомобиллардаги орқани кўришга мўлжалланган ойнага ўхшайди. Ford Consumer Cаr номи остидаги ғайриоддий концепт-карни мичиганлик дизайнер яратган. Ҳозирга ўзига янги хўжайин қидираётган мазкур машина 49,9 минг долларга баҳоланмоқда, деб хабар беради Motor.
Garage Kept Motors дилерлик марказининг сайтида ёзилишича, олд томонига улкан кўзгу ўрнатилган трапециясимон машинанинг асосини 1993 йилда ишлаб чиқарилган Ford Festiva ташкил этади. Автомобиль 2016 йилда трансформация қилинган, 2019- ва 2020 йилларда эса Калифорниядаги Петерсон автомобиль музейидаги экспозициянинг бир қисми бўлган.
Дизайнернинг мақсади машинани имкони борича нафақат ноодатий, балки минималистик ҳолатга келтириш бўлган. Олд томонидаги радиатор панжарасини кўзгу панели эгаллаган бўлиб, унинг ортида уч қатор диод фаралар яширинган. Концептнинг ойна ва эшиклари йўқ: кириш ён томонларидаги тешиклардан очилувчи тўртта зинадан амалга оширилади.
Қуйруқ қисмига ягона фонар жойлаштирилган бўлиб, у металлдан ишланган тешикли горизонтал панел ортига яширинган. Кузовнинг асосий қисми мато билан қопланган. Қизиқарли жиҳати, родстернинг салонида орқани кўришга мўлжалланган тўлақонли кўзгу йўқ — фақат ҳайдовчи томонида митти кўзгу жойлашган. Шунингдек, мультимедиа, аудио тизимлари ва ҳатто қурилмалар панели ҳам йўқ.
Дилернинг маълум қилишича, базавий жиҳозланишсиз бўлган автомобиль умумий фойдаланишдаги йўлларда ҳаракатлана олади, бироқ шлем ва ҳимоя кўзойнакларини тақиб олиш мажбурий. Родстер Ford’нинг 1,3 литрли «тўртлиги» ёрдамида ҳаракатга келади, у эса ўз навбатида беш поғонали механик узатмалар қутиси ёрдамида бошқарилади.
Эслатиб ўтамиз, 2020 йилнинг апрелида АҚШда ҳайдовчисиз бошқариладиган телевизорга ўхшаш ғайриоддий машина патентлангани тўғрисида хабар берилганди.
Мавзуга доир:
Изоҳ (0)