Жиззахда 18 февраль куни қарама-қарши йўлда ҳаракатланиб келаётган маст ҳайдовчи ЙПХ инспектори машинаси билан тўқнашди, дея хабар қилмоқда ЙҲХББ.
Маълум қилинишича, 18 февраль куни тунги соат 02:00 атрофида Жиззах шаҳри Шароф Рашидов шоҳ кўчасида қарама-қарши йўналишда ҳаракатланиб келаётган Nexia автомашинасини кўрган йўл-патруль хизмати инспектори унга тўхташ ишорасини берган.
Ҳайдовчи қайси йўналишда ҳаракатланиб кетаётганлигини билмаган, яъни ўзининг хатти-ҳаракатларини англай олмаган даражада маст ҳолатда бўлган.
Ўзига хизматда фойдаланиш учун берилган эвакуаторда транспорт воситасини жарима майдонига қўйиб қайтаётган йўл-патруль хизмати инспектори қарама-қарши йўналишда ҳаракатланиб келаётган машинани кўриб, овоз чиқарувчи мослама ва ёритиш чироқлари ёрдамида тўхташ ишорасини берган.
Бироқ Nexia ҳайдовчиси кўрсатилган белгиларга қарамай, ЙПХ инспектори автомобилига келиб тўқнашган.
Мазкур ҳолат юзасидан тегишли тартибда ҳужжатлар расмийлаштирилган.
Бундан аввал Фарғонада Matiz дарахтга урилиши оқибатида ҳайдовчининг 1 ёшли қизи вафот этгани, Навоийда маст ҳайдовчи бошқарувидаги Lacetti ЙПХ пости олдида аварияга учраб, ёниб кетгани ҳамда Фарғонада «Жигули»нинг каналга тушиб кетиши оқибатида 3 киши ҳалок бўлгани ҳақида хабар берилганди.
Изоҳ (0)