2020 йилнинг декабрида Ўзбекистонда «Кўнгил кўзи» лойиҳаси доирасида мактаб-интернатларнинг барча — 3 мингдан ортиқ кўзи ожиз ва заиф кўрувчи болаларини тиббий кўрикдан ўтказиш ва даволаш акцияси бошланган эди. Лойиҳа муаллифи, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёеванинг маълум қилишича, 20 февраль куни Жиззахдан 11 нафар бола Тошкентга олиб келинди. Уларнинг тўққиз нафарида жарроҳлик амалиёти ўтказилади, икки нафарига эса кўз протезлари қўйилади.
Ҳозирга қадар республика бўйлаб 2964 нафар бола текширувдан ўтказилганини айтганди. Жами 478 нафар бола операция қилиниб, уларда 630 та жарроҳлик амалиёти ўтказилади.
«Биз ҳар бир бола учун курашамиз ва уларга ёрдам бериш учун барча имкониятларни ишга соламиз», — деган Саида Мирзиёева.
Маълумот учун, «Кўнгил кўзи» хайрия акцияси 2019 йилнинг март ойида ўз фаолиятини бошлаган. У кўзи ожиз ва заиф кўрувчи болалар таълими, уларнинг маънавий ва руҳий ривожланиши учун муносиб шарт-шароитлар яратиш, шунингдек, келгуси ҳаётга ва жамиятга мослашиши учун йўналтирилган.
Лойиҳа доирасида брайл шрифтида дарслик нашр этиш йўлга қўйилди, кўзи ожиз ва заиф кўрувчи болалар эҳтиёжларига ихтисослаштирилган компьютер маркази яратилди, барча мактаб-интернатларнинг техник базаси ривожлантирилди ва қўйилган мақсадга эришиш учун бошқа кичик лойиҳалар амалга оширилди.
Изоҳ (0)