“Ko‘ngil ko‘zi” loyihasi doirasida Jizzaxdan 11 nafar bola Toshkentga olib kelindi — Saida Mirziyoyeva

2020-yilning dekabrida O‘zbekistonda “Ko‘ngil ko‘zi” loyihasi doirasida maktab-internatlarning barcha — 3 mingdan ortiq ko‘zi ojiz va zaif ko‘ruvchi bolalarini tibbiy ko‘rikdan o‘tkazish va davolash aksiyasi boshlangan edi. Loyiha muallifi, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyevaning ma’lum qilishicha, 20-fevral kuni Jizzaxdan 11 nafar bola Toshkentga olib kelindi. Ularning to‘qqiz nafarida jarrohlik amaliyoti o‘tkaziladi, ikki nafariga esa ko‘z protezlari qo‘yiladi.

Hozirga qadar respublika bo‘ylab 2964 nafar bola tekshiruvdan o‘tkazilganini aytgandi. Jami 478 nafar bola operatsiya qilinib, ularda 630 ta jarrohlik amaliyoti o‘tkaziladi.

“Biz har bir bola uchun kurashamiz va ularga yordam berish uchun barcha imkoniyatlarni ishga solamiz”, — degan Saida Mirziyoyeva.

Ma’lumot uchun, “Ko‘ngil ko‘zi” xayriya aksiyasi 2019-yilning mart oyida o‘z faoliyatini boshlagan. U ko‘zi ojiz va zaif ko‘ruvchi bolalar ta’limi, ularning ma’naviy va ruhiy rivojlanishi uchun munosib shart-sharoitlar yaratish, shuningdek, kelgusi hayotga va jamiyatga moslashishi uchun yo‘naltirilgan.

Loyiha doirasida brayl shriftida darslik nashr etish yo‘lga qo‘yildi, ko‘zi ojiz va zaif ko‘ruvchi bolalar ehtiyojlariga ixtisoslashtirilgan kompyuter markazi yaratildi, barcha maktab-internatlarning texnik bazasi rivojlantirildi va qo‘yilgan maqsadga erishish uchun boshqa kichik loyihalar amalga oshirildi.