Шавкат Мирзиёев «Сунъий интеллект технологияларини жадал жорий этиш учун шарт-шароитлар яратиш чора-тадбирлари тўғрисида»ги қарорни имзолагани тўғрисида хабар берилганди. Қарорга кўра, Ўзбекистондаги айрим ОТМларда «Сунъий интеллект» йўналиши бўйича кадрлар тайёрлаш йўлга қўйилади, деб хабар беради «Ҳуқуқий ахборот» канали.
Шунингдек, ҳужжатга кўра, Ахборот технологиялари ва коммуникацияларини ривожлантириш вазирлиги тузилмасида Сунъий интеллект технологияларини жорий қилиш ва ривожлантириш департаменти тузилган. Тегишли таркибда Сунъий интеллектни ривожлантириш бўйича қўшма альянс ташкил қилиниб, унга жами 200 миллиард сўм маблағ ажратилиши белгиланган.
2021 йил 1 сентябргача очиқ маълумотлар портали фаолияти доирасида давлат ва бошқа маълумотлар тўпламларини олиш имкониятини тақдим этувчи рақамли маълумотлар платформаси яратилади.
Қарорга мувофиқ, 2021/2022-ўқув йилидан грант асосида Сунъий интеллект йўналиши бўйича кадрлар тайёрлаш босқичма-босқич бошланадиган ОТМ ва илмий ташкилотлар (5 та) рўйхати тасдиқланган.
Бундан ташқари, иқтисодиёт тармоқлари, ижтимоий соҳа ва давлат бошқаруви тизимида сунъий интеллект технологияларини амалий қўллаш бўйича ўқув курслари ва фанларини жорий қилиш кўзда тутилган ОТМлар рўйхати (15 та) тасдиқланган.
2021 йилдан сунъий интеллект соҳасида стажёр-тадқиқотчилар ҳамда таянч докторантурада таҳсил олиш учун ҳар йили 5 кишилик квота мақсадли ажратилади. Рақамли технологиялар ва сунъий интеллект докторантура ихтисослиги ташкил қилинади.
Изоҳ (0)