Тошкент шаҳри ва вилоятида 30 га яқин автомобилни талон-торож қилган гуруҳ қўлга олинди

Тошкент шаҳри ва вилоятида автомобилларни талон-торож қилган ҳамда хонадонлардан бирининг саккиз бош қўйини ўғирлаган шахслар қўлга олинди, дея хабар бермоқда вилоят ИИББ.

Маълум қилинишича, 2021 йилнинг 20 январь куни Тошкент тумани «Кўҳинур» маҳалласида яшовчи фуқаро Ф.А. туман ИИБга ариза билан мурожаат қилади.

У аризасида 2021 йил 19 январдан 20 январь кунига ўтар кечаси ўз яшаётган уй олдида қолдирган Changan автомашинасининг эшиги номаълум шахслар томонидан очилиб, автомашина салонида бўлган бир миллион сўмлик антирадар мосламаси, 250 минг сўмлик «аудио магнитофон» ва бошқа майда буюмлар ҳамда 300 минг сўм миқдоридаги нақд пулларни яширин равишда талон-торож қилиб кетилганлигини баён қилиб, уларга нисбатан қонуний чора кўришни сўрайди.

Ҳолат юзасидан Тошкент тумани ички ишлар бошқармаси тезкор ходимлари томонидан олиб борилган суриштирув ишлари давомида 5 февраль куни ушбу жиноятни содир этганликда гумон қилинган бир гуруҳ шахслар — Зангиота туманида яшовчи 1979 йилда туғилган М.С., 2001 йилда туғилган М.Ш., 1993 йилда туғилган Д.Н. ва вояга етмаганлар 2003 йилда туғилган Ш.Т. ҳамда 2005 йилда туғилган И.М. қўлга олинди.

Шунингдек, суриштирувлар давомида ушбу уюшган гуруҳ Тошкент вилояти ва пойтахт ҳудудидан 30 га яқин турли хилдаги автотранспорт воситасини ғайриқонуний очиб, транспорт ичида бўлган пул ва қимматбаҳо буюмларни талон-торож қилиб келгани аниқланади.

Жумладан, улар Тошкент тумани «Оқтом» маҳалласи ҳудудида 16 январь куни Damas, Lacetti ва Matiz автомашинасини, 18 январь куни «Кўксарой» маҳалласида Nexia автомашинасини, 20 январь куни эса «Кўҳинур» маҳалласида Changan ва Cobalt, «Кўксарой» маҳалласида Gentra ва яна бир Nexia автомашиналарини эшикларини бузиш орқали очиб, ичидаги нарса ва буюмларни талон-торож қилган.

Шунингдек, 3 февраль куни Зангиота тумани ва Тошкент шаҳрининг Олмазор ва Шайхонтоҳур туманлари ҳудудида 21 та ҳар хил турдаги автомашинани эшикларини бузиш орқали очиб, ичидаги нарса ва буюмларни олиб, воқеа жойидан яширинган.

Бундан ташқари, 25 январь куни Зангиота туманидаги хонадонларнинг биридан саккиз бош қўйни ўғирлаб, сотиб юборганлиги аниқланган.

Ҳозирда мазкур ҳолат юзасидан Тошкент тумани ИИБ ҳузуридаги тергов бўлими томонидан ушланган шахсларга нисбатан Жиноят кодексининг 169-моддаси 3-қисми «в» банди (кўп миқдорда ўғрилик) билан жиноят иши қўзғатилган. Гумонланувчилар процессуал тартибда ушланган.

Бундан аввал Россияда бири 20 йил, иккинчиси 10 йилдан бери қидирувда бўлган транспорт воситалари Тошкент вилоятида сақлаб келингани аниқлангани ҳамда Сергелида 3 та Spark’дан қиймати жами 11 миллион сўмдан ортиқ бўлган пул ва буюмларни ўмарганлар қўлга олингани ҳақида хабар берилганди.