Туркияда коронавирус пандемияси келтириб чиқарган молиявий муаммолар сабабли кўплаб меҳмонхона эгалари ўз бизнесини сотиб юбормоқда. Бу ҳақда «Tengritravel.kz» хабар берди.
Туркиянинг энг катта тижорий сайтларидан бири «Sahibinden.co» маълумотларига кўра, охирги ой ичида Анталиянинг ўзида 234 та меҳмонхона сотувга қўйилди: Муратпашада 56 та, Аланяда 42 та, Кемерда 39 та, Манавгатда 33 та. Шунингдек, Кашдаги 21 та, Коняалтада 16 та, Серикда 13 та, Кумлижада саккизта, Кепезда 3 та, Финик, Газипаша ва Демреда 1 тадан сайёҳлик объектлари сотувга қўйилди.
Сотувга қўйилган объектларнинг энг қиммати 585 миллион турк лирасига (тахминан 883 миллиард 336 миллион 739 минг сўм) баҳоланган. Конакли ҳудудида жойлашган беш юлдузли бу меҳмонхона 330 та хонадан иборат бўлиб, бир вақтнинг ўзида мингга яқин мижозга хизмат кўрсата олади.
Энг арзон объект 5 миллион 200 минг турк лирасига (тахминан 7 миллиард 851 миллион 882 минг сўм) баҳоланган.
Аланя сайёҳлик операторлари ассоциацияси (АLTİD) ва Аланя туризм ва тарғибот фонди (АLTАВ) вице президенти Меҳмет Даҳаоглунинг сўзларига кўра, меҳмонхоналар аввал ҳам сотилган, лекин бундай миқдорда эмас.
«Ўрта Ер денгизи минтақасида меҳмонхоналарнинг бу даражада кўп сотилишига асосий сабаблардан бири — бу пандемия натижасида юзага келган иқтисодий инқироз. Ким ҳам пул келтириб турган, қўшимча иш ўринлари яратиб, мамлакатга фойда келтираётган тайёр бизнесни сотиб юборишни хоҳлайди?», — деди Даҳаоглу.
Маълумот учун, 2020 йилда Туркия меҳмонхоналари пандемия сабабли сайёҳлар оқимининг 80 фоизга тушиб кетгани учун молиявий қийинчиликларга дуч келди. Туркия Меҳмонхоналар федерацияси (TUROFED) ҳисоб-китобига кўра, 2021 йилда мамлакатга 25 миллиондан 30 миллионгача турист ташриф буюриши мумкин. 2019 йилда Туркияга 50 миллион сайёҳ ташриф буюрган.
Аввалроқ Туркияда апрель ойидан туризм қайта иш бошлаши ҳақида хабар берилган эди.
Изоҳ (0)