Олимлар коронавируснинг Буюк Британияда аниқланган штамми инфекциянинг асл шаклига қараганда хавфлироқ эканлигини маълум қилди. Бу ҳақда Янги ва ривожланаётган респиратор вируслари бўйича маслаҳат гуруҳи (NERVTAG) мутахассисларининг ҳисоботига таяниб «Известия» хабар берди.
Янги штаммнинг ўлимга олиб келиш даражаси 30—70 фоиздан кўп, одамдан одамга юқиш даражаси эса 35—45 фоизга юқорироқ, дейилган ҳисоботда. Тадқиқот Лондондаги етакчи тиббиёт муассасаларидан олинган COVID-19’га чалиниш бўйича ҳолатлар тўғрисидаги маълумотларга асосланган.
Тадқиқотчиларнинг фикрига кўра, VUI-202012/01 штаммининг ўлимга олиб келиш сабаблари ва касаллик белгиларига янада ойдинлик киритиш учун ушбу материалларни чуқурроқ ўрганиш талаб қилинади. Дастлабки маълумотларга кўра, «британча» штаммни юқтирган одамда ўлим хавфининг бўлиши инфекцияланган пайтда танада вирус юкламасининг ошиши билан боғлиқ. Натижада бемор касалликнинг оғир босқичини бошдан кечиради. Британиянинг SARS-CoV-2 мутацияси болалар, ўспирин ва 21 ёшгача бўлган ёшлар учун жуда хавфли экани маълум қилинган.
Аввалроқ россиялик олимлар коронавируснинг «британча» штаммини аниқлайдиган дунёдаги биринчи тест тизимини ишлаб чиқиб, уни рўйхатдан ўтказгани ҳақида хабар берилганди.
Эслатиб ўтамиз, 2021 йил 30 январь куни коронавируснинг «британча» штамми Ўзбекистонга кириб келгани маълум бўлган. У 23 январь куни Дубайдан қайтиб келган 10 ёшли қизчада аниқланган. ЎзССВ коронавируснинг янги штамми аниқланган қизча ҳақида 1 ҳафтадан кейин маълум қилинганига изоҳ берган.
Коронавирусга қарши кураш штаби аъзоси Нурмат Отабеков мазкур штамм аниқланган бемор аэропортнинг ўзида алоҳидалангани ва вирус одамлар орасига киришига йўл қўйилмагани ҳақида маълум қилган.
Изоҳ (0)