Тошкент вилоятида ЙПХ инспекторига 1 500 000 сўм пора бермоқчи бўлган ҳайдовчи ушланди, дея «Дарё»га хабар бермоқда вилоят ИИББ ЙҲХБ ахборот хизмати.
Қайд этилишича, 2021 йил 11 февраль куни Тошкент вилояти Юқори Чирчиқ тумани ҳудудидан ўтган 4Р6 Тошкент—Чорбоғ автомобиль йўлида хизмат олиб бораётган Тошкент вилояти ИИББ ЙҲХБ ЙПХБ Махсус отряди катта инспектори, лейтенант М.Туропов, тахминан, соат 11:20 ларда Бўстонлиқ тумани йўналишидан ҳаракатланиб келаётган Қашқадарё вилояти рўйхатида турувчи 1992 йилда туғилган фуқаро Р.А. бошқарувида бўлган Nexia-3’ни хавфсизлик камари тақмагани учун тўхтатган.
Инспектор ҳайдовчининг оғзидан спиртли ичимлик ҳиди анқиб турганлигини гумон қилиб, уни икки холис олдида тиббий кўрикдан ўтишга таклиф қилган. Натижада ҳайдовчи Р.А. спиртли ичимлик ичганлигини тан олиб, икки холис олдида тиббий кўрикдан ўтишдан бош тортган.
ЙПХ инспектори ушбу ҳолат юзасидан Маъмурий жавобгарлик тўғрисидаги кодекснинг 136-моддасига кўра (ҳайдовчиларнинг ва йўл ҳаракати бошқа иштирокчиларининг мастлиги ёки маст эмаслигини аниқлаш учун текширувдан ўтишдан бўйин товлаши) маъмурий баённома расмийлаштириб, автомашинани жарима майдонига жойлаштирган.
Шундан сўнг Nexia-3 ҳайдовчиси Р.А. ўзига нисбатан расмийлаштирилган маъмурий баённомани бекор қилиб, автомашинани жарима майдонидан чиқариб бериш эвазига ЙПХ ходимига 1 500 000 сом пулни пора тариқасида таклиф қилган.
Ҳолат юзасидан ЙПХ ходими билдирги орқали вилоят ИИББ бошлиғига мурожаат қилиб, қонунда белгиланган тартибда чора кўрилишини сўраган.
ЙПХ ходимининг билдиргиси асосида хавфсизлик хизмати ходимлари томонидан ўтказилган тезкор тадбир давомида 2021 йилнинг 11 февраль куни Юқори Чирчиқ тумани, Болта қишлоғида жойлашган жарима майдончасида соат 18:20 ларда фуқаро Р.А. ЙПХ ходимига 1 500 000 сўм миқдоридаги пулларни пора тариқасида берган вақтда ашёвий далиллар билан ушланган.
Мазкур ҳолат юзасидан Юқори Чирчиқ тумани прокуратураси томонидан тергов ҳаракатлари олиб борилмоқда.
Бундан аввал Гулистонда жарима майдончасидан машинасини чиқариб беришини сўраб, ЙҲХБ ходимига пора таклиф қилган ҳайдовчи қўлга олингани, Андижонда мусиқа мактаби директори 500 доллар пора билан ушлангани ҳамда Фарғонада 8 гектар ер олишда ёрдам бериш эвазига 8 минг доллар олган собиқ кадастр ходими ушлангани ҳақида хабар берилган эди.