Тошкентда ҳайдовчилик гувоҳномасини олмаган 17 ёшли ҳайдовчи Cobalt автомобилида автобус бекати ва яна иккита енгил машинага бориб урилиб, йўл-транспорт ҳодисасини содир этди, деб хабар беради ИИВ ЙҲХББ ахборот хизмати.
Маълум қилинишича, 14 февраль куни соат 19:00 ларда Мирзо Улуғбек тумани Осиё кўчасида 2003 йилда туғилган (ҳайдовчилик гувоҳномаси олмаган) М.М. исмли ҳайдовчи Cobalt’да ҳаракатланаётиб, Кардиология маркази рўпарасига етган вақтида бошқарувни йўқотган ва автобус бекатига урилган. Шунингдек, у бекат ортидаги автотураргоҳда тўхтаб турган Ф.Э. бошқарувидаги Cobalt ва фуқаро А.Х.га тегишли яна бир Cobalt билан ҳам тўқнашган.
Тўқнашув оқибатида 33 ёшли пиёда тан жароҳати олган бўлиб, унга биринчи тез тиббий ёрдам кўрсатилган.
«Мазкур ЙТҲ юзасидан Тошкент шаҳар ИИББ ЙҲХБ томонидан суриштирув ишлари олиб борилиб, ҳодиса сабабларига аниқлик киритилмоқда», — дейилади хабарда.
Аввалроқ Наманганда 20 ёшли йигит бошқарувидаги Lacetti катта тезликда реклама устунига бориб урилиши оқибатида ҳайдовчи ва икки нафар йўловчи воқеа жойида вафот этгани тўғрисида хабар берилганди.
Изоҳ (0)