Қарши давлат университети талабалари учун 2021 йил якунига қадар университет ҳудудида 800 ўринли ётоқхона қурилади. Бу ҳақда «Дарё»га университет ахборот хизмати раҳбари Ойбек Юсупов маълум қилди.
Ойбек Юсуповнинг айтишича, бу ҳақда ректор Дилмурод Набиев талабалар билан мулоқот чоғида маълум қилган.
«Университетида ректор ва ёшлар учрашуви ташкил этилди. Унда университетнинг физика-математика факультетида ижарада туриб таҳсил олувчи 300 нафарга яқин талаба иштирок этди. Талабалар билан суҳбат давомида университет ректори ижарада турувчи ёшларни қийнаб келаётган энг катта муаммо — ётоқхона масаласида сўз юритиб, ижарада турувчи ёшлар рўйхатини шакллантириб, улар яшаб турган жойнинг университетга узоқ-яқинлиги ва яшаш шароитининг қай даражадалиги, шунингдек, талаба яшаб турган маҳалланинг тинч ёки нотинчлигига қараб, яшил, сариқ ва қизил тоифага ажратиб олишни таклиф қилди», — дейди Ойбек Юсупов.
Маълум бўлишича, айни кунда Қарши давлат универтитетида жами 18 минг 339 нафар талаба таҳсил олади. Шундан 11 минг 211 нафари бакалавр йўналишида таҳсил олиб, уларнинг 2 минг 765 нафари ижарада яшайди. Университетнинг 1050 ўринли ётоқхонасида эса 1000 нафар талаба истиқомат қилади.
«Университет ихтиёрига берилган лицей ва педагогика коллежи ётоқхоналари ҳисобидан 500 ўринли ётоқхона қилиш мўлжалланмоқда. Шу ётоқхоналарга дастлаб қизил тоифага киритилган талабаларни жойлаштирамиз. Шунингдек, 2021 йил якунига қадар университет ҳудудида талабалар учун 800 ўринли янги ётоқхона қуриб, фойдаланишга топширилиши маълум қилинди», — дейди университет ахборот хизмати раҳбари.
Айтилишича, ректор ва талабалар мулоқотида Дилмурод Набиев талабалар мурожаати учун Telegram мессенжерида махсус мурожаат бот яратилганини айтиб, ҳар қандай муаммода тўғридан-тўғри ректор билан мулоқот қилиш имконияти яратилганини билдирган ва «Сизни қийнаётган муаммони тўғридан-тўғри менга юборинг. Қўрқманг, бу ботга келган мурожаатларни фақат ва фақат ўзим ўқийман. Шахсингиз сир сақланган ҳолда, муаммойингизга биргаликда ечим топамиз», — деган ректор.
Эслатиб ўтамиз, Президент Шавкат Мирзиёев раислигида 2021 йил 27 январь куни ўтказилган видеоселектор йиғилишида давлат раҳбари Ўзбекистондаги олий ўқув юртларининг талабалар турар жойларига эътибор қаратиш зарурлигини қайд этиб, «Сўнгги тўрт йил мобайнида олийгоҳлар сони 47 тага ортиб, бугунги кунда 129 та олий ўқув юртида 500 мингдан ортиқ талаба таълим олмоқда. Лекин биргина пойтахтдаги 85 та талабалар уйи атиги 13 фоиз ёшларни турар жой билан таъминлаш имкониятига эга. Ёки 18 минг нафар талаба таҳсил олаётган Самарқанд давлат университетида бор-йўғи 1 минг 600 ўринли ётоқхона мавжуд», — деганди.
Изоҳ (0)