Фарғонада кўп қаватли турар жойлар ўртасида барча қурилишлар тўхтатилиб, болалар ва спорт майдончалари қайта тикланади

Фарғона шаҳрида кўп қаватли турар жойлар ўртасида барча қурилишлар тўхтатилиб, пойдевор учун қазилган котлованлар кўмилади. Болалар ҳамда спорт майдончалари қайта тикланади. Бу ҳақда вилоят ҳокимлиги матбуот хизмати хабар берди.

Қайд этилишича, вилоят ҳокими Хайрулло Бозоров Фарғона шаҳридаги «Дўстлик» ҳамда «Гулзор» маҳаллаларидаги аҳоли яшаш шароитларини ўрганиш жараёнида ҳудудда кўп қаватли турар жойлар орасида яшил майдонлар ҳудудидаги дарахтлар кесилгани, болалар ва спорт майдончалари бузилгани ва ўрнига янги бинолар қурилиши бошланганига гувоҳ бўлган.

Ҳудудда яшовчи аҳоли вилоят ҳокими билан мулоқот чоғида янги қурилаётган бинолар сабабли маҳаллада аҳоли яшаши учун ноқулайликлар туғилаётганини, болалар учун очиқ ҳавода ўйнашга, катталар ва кексалар учун сайр қилишга имконият қолмаганини билдирган.

Вилоят ҳокими биргаликда ўрганиш олиб бораётган шаҳар ҳокими ва прокурорига 13 февралдан бошлаб Фарғона шаҳрида кўп қаватли турар жойлар ўртасида олиб борилаётган барча қурилишларни тўхтатиш ҳамда бундай қурилишларга рухсат бериш билан боғлиқ қарорларни бекор қилиш юзасидан топшириқ берди.

Шу сабабли пойдевор учун қазилган котлованлар барчаси кўмиб ташланади, қурилиши якунлашиш босқичида бўлган иншоотларнинг ҳар бирининг қонунийлиги бўйича шаҳар прокуратураси ўрганиш олиб боради. Барча ҳудудларда бузиб ташланган болалар ҳамда спорт майдончалари қайта тикланади, қурилиш эгалари кесилган ҳар бир дарахт ўрнига 100 тупдан манзарали дарахт экиши таъминланади. Тўхтатилган қурилишлар ўрнига тадбиркорларга бино қуриш учун бошқа жойдан ер майдони таклиф этилади.

Хайрулло Бозоров, шунингдек, ҳудуддаги атроф-муҳит тозалигига эътибор берилмаётганини, чиқиндилар сочилиб ётгани, турар-жойлар атрофида ободонлаштириш ишларининг умуман йўлга қўйилмаганини, биноларга бириккан ҳолда вақтинчалик қўшимча иншоотлар қуриб ташланганини танқид қилган.

«Фарғона турар жой массивларида файз бўлиши шарт», — деган вилоят ҳокими. Шаҳар маҳаллаларини ободонлаштириш ҳамда кўкаламзорлаштириш бўйича алоҳида манзилли дастур ишлаб чиқиш юзасидан шаҳар ҳокими Мирзоҳид Убайдуллаевга топшириқ берган.

Шаҳарнинг Мотуридий кўчаси ҳудудидан оқиб ўтувчи катта ариқ устидаги объектлар олиб ташланиб, сув қирғоғи бўйлаб велосипед миниш ҳамда сайр қилиш учун экойўлак ташкил этилади.

Эслатиб ўтамиз, Шавкат Мирзиёевнинг 3 февралдаги фармони билан республикада давлат ўрмон фондига кирмайдиган дарахт ва буталарнинг қимматбаҳо навлари кесилишига жорий этилган мораторийнинг амал қилиш муддати 2021 йил 31 декабргача узайтирилган. Ноқонуний кесилган ҳар туп дарахт учун 100 туп кўчат экишни мажбурий этиш таклиф этилган.