Хитой миллий космик бошқармаси (CNSA) Марснинг оқ-қора рангли суратини эълон қилди. Унда Марснинг геологик ўзига хослиги, хусусан, Скиапарелли кратери ва Маринер водийси тасвирланган, деб хабар беради Hi-Tech.Mail.ru.
Кадр Марсдан тахминан 2,2 миллион километр узоқликдан суратга олинган. Космик аппарат 197 кундан буён парвоз қилмоқда ва бир неча ойдан сўнг (апрель—май) у сайёрага қўниши амалга ошириш ҳамда тадқиқотларни бошлаши лозим.
Эслатиб ўтамиз, «Тяньвэнь-1» марсоходи NASA’нинг янги марсоходи билан деярли бир вақтда учирилган эди: Хитой зонди 2020 йилнинг 23 июлида учирилган бўлса, Perseverance 30 июлда учирилган эди.
Иккала аппарат ҳам сайёранинг геологик тузилмасини, юза қатлам таркибини ва Марсдаги музликларнинг тақсимланишини ўрганади. Шунингдек, улар ёрдамида электромагнит ва гравитацион майдонларнинг ўзига хослиги ўрганилади. Бу «Қизил сайёра»нинг иқлими ҳақида кўпроқ маълумот олишга ёрдам беради.
Эслатиб ўтамиз, 2020 йилнинг декабрида Хитойнинг «Чанъэ-5» автоматик станцияси Ой юзасидан йиғиб олинган тупроқ намуналари солинган капсулани Ерга юборганди.
Изоҳ (0)