Организм саломатликда кузатиладиган ўзгариш ва муаммолардан турли симптомлар орқали дарак беради. Юз, қўллар, соч ва ҳатто оёқлар кафти ҳам қайсидир касаллик бошланаётгани ҳақида огоҳлантириши мумкин. Асосийси эса буни ўз вақтида пайқаш ва чора кўриш.
Терининг қуриши ва кўчиши
Терининг қуриши ва кўчиши кузатилиши қалқонсимон безда муаммо борлигини билдиради. Агар намлантирувчи кремдан фойдалангандан кейин ҳам тери қуруқлигича қолса ва кўчса, эндокринолог кўригидан ўтиш тавсия қилинади. Гап шундаки, айрим гормонлар миқдорининг ошиши ёки камайиши терини қуриши, ёриқлар пайдо бўлиши ва тирноқлар мўртлашишига таъсир қилиши мумкин.
Оёқ бармоқларида туклар бўлмаслиги
Оёқдаги туклар бирдан йўқ бўлиб, тери оқариб қолган бўлса, зудлик билан шифокорга мурожаат қилинг. Бу юрак қон-томирдаги жиддий касалликларга олиб келиши мумкин бўлган артерия деворларида муаммо борлигидан дарак бериши мумкин.
Яра ва тирналишларнинг битмаслиги
Глюкозанинг миқдоридан ошиб кетиши организм, хусусан оёқ-қўл соҳасидаги қон айланиши ёмонлашганининг аломати бўлиши мумкин. Шу сабаб ҳам арзимас яранинг ҳам битиши қийин кечиши мумкин. Агар сизда шундай ҳолат кузатиладиган бўлса, қондаги қанд миқдорини текширтириш ва эндокринологга мурожаат қилиш керак.
Бош бармоқнинг йўғонлашиши
Ушбу симптом артрит ёки пешоб кислотасининг ошиши сабаб келиб чиқадиган подаградан дарак бериши мумкин. Меъёрда ушбу кислота пешоб билан организмдан чиқиб кетиши керак, аммо айрим ҳолларда унинг чўкиндилари бўғинлар орасида тўпланиши мумкин.
Тирноқ остида қизил чизиқларнинг пайдо бўлиши
Тирноқ пластинаси остидаги ингичка чизиқлар, ингичка қон-томирлар шикастланганидан далолат бўлиши мумкин. Бу муаммо юрак яллиғланиши яъни инфекция борлиги сабаб кузатиладиган эндокардитдан далолат бериши мумкин. Инфекция даволанмаса, юрак етишмовчилигига олиб келиши мумкин.
Бармоқларнинг йўғонлашиши, деформация
Ушбу симптом тирноқ ва бармоқ учида жойлашган майда артерияларнинг қон билан таъминланиши ёмонлашиши билан намоён бўладиган юрак касалликлари ва ўпка саратонидан дарак бериши мумкин. Шу сабаб ҳам ушбу белгига бефарқ бўлмаслик дарҳол шифокорга мурожаат қилиш керак.
Изоҳ (0)