Ёш ўтиши билан саломатлик ва организмда муаммолар кўпая бошлайди. Аммо баъзиларда ёшга нисбатан эрта кузатиладиган ҳолатлар кўзга ташланиши, бу эса турли симптомлар билан намоён бўлиши мумкин.
Қўллар кучсизланади
Қўл қисиб кўришиш ва ҳатто банканинг қопқоғини очишда ҳам куч етмаганидан қийналиш ёш ўтаётганидан дарак бериши мумкин. The Lancet нашрида эълон қилинган тадқиқотда маълум қилинишича, қўл сиқишнинг кучсизлиги турли сабабларга кўра ўлим хавфининг 16 фоизга юқори эканини билдиради. Гап шундаки, ёш ўтиши билан мушаклар массаси йўқолиб боради ва бунга чора кўрилмаса, қариш жараёни эрта бошланиши эҳтимоли юқори бўлади.
Бел соҳасида ёғ тўпланиши
Ёш ўтиши билан ҳамманинг вазни ўзгариб бориши мумкин, лекин қоматнинг эркакларникига ўхшаши, яъни ёғнинг бел соҳасида йиғилиши бефарқ бўлмаслик керак бўлган жараён ҳисобланади. 2019 йилда ўтказилган тадқиқотларда қорин соҳасида ёғ тўпланган аёлларда юрак хавфли касалликлари бўксасида ёғ тўпланганларга нисбатан икки карра кўпроқ экани маълум бўлган.
Юришнинг секинлиги
Юриш даражасининг қанчалик тез экани ҳам қаришни аниқлашга ёрдам беради. 900 нафар иштирокчи қатнашган тадқиқот натижаларига кўра, юриши бошқаларга нисбатан секинроқ бўлган кишиларнинг жисмоний саломатлигида муаммо борлиги, ҳамда кузатувчилар уларнинг ёшини катта деб ҳисоблагани маълум бўлган. 2018 йил Британиянинг тиббиёт журналида тақдим қилинган тадқиқотда эса кун давомида соатига 6 км тезликда сайр қилиш ўлим хавфини 20 фоизга камайтириши аниқланган.
Суяк синишининг кўп кузатилиши
Суяклар мўртлашиши кексалик яқинлашаётганидан яна бир дарак ҳисобланади. 40 ёшдан кейин организмда кальций камаяди, йилдан йилга ушбу жараён тезлаша бошлайди. Қолаверса, ёш ўтиши билан ҳужайралар суяклар мустаҳкамлиги учун аҳамиятли бўлган Д витаминини сақлаши қийин кечади, оқибатда жароҳатланиш, синиш-чиқиш ҳолатли кўп кузатилади.
Юз пропорцияси ўзгаради
Йиллар ўтиши билан камайиб борадиган яна бир муҳим модда – терининг таранглигида муҳим роль ўйнайдиган ва ҳимоя сетка вазифасини ўтайдиган коллаген ҳисобланади. У қанчалик камайса, тери тўқималари шунчалик ўзгара бошлайди. Шунингдек, ёш катта бўлгани сайин жағнинг ўзгариши юз пропорциясига ҳам таъсир қилмай қолмайди.
Изоҳ (0)