Россиянинг «Спутник V» коронавирусга қарши вакцинаси Ливан ва Серб Республикаси (Босния ва Герцеговиниянинг бир қисми)да рўйхатдан ўтказилди, деб хабар бермоқда «Интерфакс».
Рўйхатдан ўтказиш тўғрисидаги қарор Ливан ва Серб Республикаси Соғлиқни сақлаш вазирликлари томонидан қабул қилинган.
Маълумот учун, «Спутник V» вакцинаси йўриқномасида саратонга чалинганларни эмлашга қарши кўрсатмалар пайдо бўлган. Унга кўра, дори онкологик беморлар учун хавфли бўлиши мумкин.
«Спутник V» вакцинасидан фойдаланиш илгари Жазоир, Аргентина, Беларусь, Боливия, БАА, Венгрия, Сербия, Фаластин, Венесуэла, Парагвай, Покистон, Туркманистон ва Эронда тасдиқланган эди. Вакцина ишлаб чиқаришни молиялаштирадиган Россия тўғридан-тўғри инвестиция жамғармасининг маълумотларига кўра, 30 дан ортиқ давлат Россия вакциналарига қизиқиш билдирган.
Аввалроқ Украина соғлиқни сақлаш вазири Максим Степанов «Спутник V» вакцинаси Украинада рўйхатдан ўтказилмаслигини маълум қилганди. Унинг айтишича, «қайсидир сиёсий куч Россия вакцинасини рўйхатдан ўтказиш масаласида қандайдир васваса келтириб чиқарган», аммо Киев «Спутник V»ни рўйхатдан ўтказмайди.
Изоҳ (0)