Porsche компанияси Британиянинг Brands Hatch Circuit трассасида Taycan 4S ва Turbo S серияли моделларини бардошлилик синовидан ўтказди. Бир неча соат давом этган минг километрли ҳаракатланиш давомида электромобиллар Буюк Британияда 13 та рекордни ўрнатган, деб хабар беради Motor.
Porsche вакиллари синовда 570 от кучига эга Taycan 4S ҳамда 760 от кучига эга Turbo S суперкарларидан фойдаланган. Иккала электрокар ҳам сиғими 93 киловатт-соатга тенг аккумулятор батареялари билан жиҳозланган. Синов давомида электромобиллар 1000 километр йўлни босиб ўтиши ва пит-стоп вақтида аккумуляторларини қувватлантириши керак бўлган.
Taycan’ларни бошқарган ҳайдовчилар орасида бир-бирини алмаштириб турган машҳур пойгачилар бор. Электрокарларни «Формула-1» собиқ пойгачиси Жонатан Палмер, «24 соатли Ле-Ман» афсонаси Ричард Эттвуд, шунингдек, бир нечта Porsche ғолиблари бошқарган. Ҳаракат тонгги соат 07:00 да бошланган бўлиб, соат 20:00 да тугаган. Синовлар вақтида ҳайдовчилар турли об-ҳаво шароитига дуч келган.
Трассада ҳаракатланиш давомида Porsche суперкарлари Буюк Британиядаги 1000 килограммдан оғирроқ бўлган электромобиллар орасида 13 та рекордни ўрнатган. Масалан, Porsche Taycan 4S минг километр масофани 13 соат 25 сонияда, 500 километрли йўлни 6 соат 31 дақиқа-ю 56 сонияда, 100 километрни 1 соат 1 дақиқа-ю 5 сонияда босиб ўтган. Taycan Turbo S эса 200 километрли йўлни 2 соат 28 дақиқа-ю 49 сонияда босиб ўтишга муваффақ бўлган.
Аввалроқ Porsche Taycan АҚШни 44 соатда босиб ўтиб, Tesla рекордини янгилагани тўғрисида хабар берилганди.
Изоҳ (0)