2020 йилда Toyota BMW’ни ортда қолдириб, қидирув тизимлари орқали энг кўп қидирилган автомобиль маркасига айланди. Бу ҳақда дунёнинг 158 мамлакатидаги энг оммабоп сўровлар бўйича Google Тrends маълумотларини таҳлил қилган Британиянинг Compare the Market таҳлилий агентлиги ҳисоботида келтирилган, деб хабар беради Motor.
Таҳлилларга кўра, Япониянинг Toyota компания 2020 йилда дунёнинг 55 мамлакатидаги қидирув тизимларида етакчиликни қўлга киритган. 2019 йилга қараганда 28 давлатда ўз натижаларини яхшилаб олган Toyota’нинг оммалашиши модель қаторларининг кенгайиши билан изоҳланмоқда, хусусан, улар орасидан S+под электрокари, янги Yaris, водородда ҳаракатланадиган Mirai ва, албатта, бешинчи авлод RAV4 ўрин олган.
Шу билан бирга, BMW’нинг интернетдаги машҳурлиги тушиб кетган: 2019 йилда Бавария маркаси 118 мамлакатдаги қидирув тизимларида етакчилик қилган бўлса, 2020 йилда — фақат 34 мамлакатда. Шунга қарамай, бренд рейтингни иккинчи поғонасидан ўрин олган ва сўнгги уч йил давомида энг кўп қидирилган маркага айланди.
Учинчи ўрин Mercedes-Benz’га насиб этди — дунёнинг 15 мамлакатида уни энг кўп қидиришган. Тўртинчи поғонада Кia (7 та давлат) жойлашган бўлса, ундан кейин Ford (6 та давлат) ўрин олган. Шунингдек, рўйхатда Volvo, Audi, Honda, Nissan, Renault, Hyundai ва Peugeot маркалари жойлашган.
Аввалроқ дунёда бир дақиқа ичида энг кўп машина ишлаб чиқарадиган автомобиль компаниялари рейтинги эълон қилинган эди.
Изоҳ (0)