Россиядаги барча кинотеатрларда Samsung Galaxy S20 Ultra флагмани ёрдамида суратга олинган тўлиқ метражли фильм прокати бошланди, деб хабар беради IXBT.
«Икки карра икки» мелодрамасини суратга олиш ишлари 2020 йилнинг август ойида Москвада бўлиб ўтган. Samsung матбуот хизматининг маълум қилишича, лойиҳа режиссёри Виталий Манюков смартфонни қулайлиги ва ишлашдаги оддийлиги учун танлаган. Натижада суратга олиш гуруҳи фильм устидаги ишлар учун кетадиган вақтни сезиларли даражада камайтиришга муваффақ бўлган.
«Смартфон ёрдамида фильм суратга олинди — бу, шубҳасиз, биринчи навбатда ўзимиз учун дадил қадам. Смартфон камерасидан томошабинлар учун тижорий кинони суратга олиш имкониятини тадқиқ этиш менга қизиқ бўлди. Тўғрисини айтсам, натижа ҳам кутилганидан аъло. Тасвир етарлича тиниқ. Меники каби мустақил студиялар учун бундай ихтиро рақобатдош устунликни беради, чунки смартфон билан суратга олиш, авваламбор, суратга олиш жараёнини тезлаштириш орқали ишлаб чиқариш харажатларини сезиларли даражада камайтиради», — дейди Виталий Манюков.
Лойиҳада асосий ролларни Олга Литвинова («Экипаж», «Изқувар-3»), Иван Николаев («Клуб»), Андрей Крижний («Физрук»), Григорий Дансигер, Артур Диланян ва бошқалар ижро этган. Фильм сюжети марказидан жанжалдан сўнг дўстлик ва муносабатларни сақлашга интилаётган икки жуфтликнинг тарихи ўрин олган.
Аввалроқ Samsung компанияси Galaxy S20 ёрдамида 8К фильм суратга олиши маълум бўлганди.
Изоҳ (0)