Машҳур изқувар ролини ижро қилиш таклиф қилинганда Дэвид Суше 41 ёшда бўлган. Аввалига розилик беришга иккиланган актёр кейинчалик тўғри танлов қилганини тушуниб етган. Суратга олиш ишлари 25 йил, 1988 йилдан 2013 йилгача давом этган сериалдаги бельгиялик изқувар қаҳрамони мухлислар қалбидан жой олган. Пуаро роли билан яхши таниш бўлишига қарамай, яна 90 та фильм ва сериалларда суратга тушишга улгурган актёр ҳақидаги маълумотларни эътиборингизга ҳавола этамиз.
Суратга олишни яхши кўради
Онаси Жоан Патрисия актриса, отаси Жек Суше эса шифокор бўлган. Улар 1932 йилда Жанубий Африкадан Англияга кўчиб келган. Буваси Жеймс Жарше машҳур суратчи бўлган. Дэвид ҳам фотографияни яхши кўрган, суратга олиш майдончасидаги актёр ва актрисаларни иш жараёнида суратга тушириб юрган. Ёшлигида спорт билан шуғулланиш жони-дили бўлган Суше регби, теннис ва крикет ўйнаган.
Касбини ташлаб, ўзини оиласига бағишлагани сабаб рафиқасидан миннатдор
У бўлажак рафиқаси Шейла Феррис билан театрда танишган. Бир-бирини ёқтириб қолган Дэвид ва Феррис маълум вақт давомида ҳис-туйғуларини яшириб юрган. «Дракула» спектаклида бирга рол ижро қилган актёрлар 1972 йилда турмуш қурган. 1981 йил жуфтлик илк марта фарзандли бўлган. Орадан икки йил ўтиб иккинчи фарзанди дунёга келган. Шундан кейин Шейла актрисалик фаолиятга нуқта қўйиб, фарзандлар тарбияси билан шуғуллана бошлаган. Дэвид интервьюларда у билан яшаш осонмаслиги, ишига жуда ҳам жиддий ёндашиши ва ролидан бошқа нарсани ўйлай олмаслигини таъкидлайди. Оила аъзолари учун бу осон бўлмаслигига қарамай, сабрли рафиқаси уни ҳамиша қўллаб-қувватлайди, ўзига ишонишга ундаб, ролларга тайёргарлик қилишига ёрдам беради.
Пуаро ҳақидаги барча ҳикояларни ўқиб чиққан
Изқувар ролини гавдалантириш таклиф қилинмагунича Суше бирон марта ҳам Пуаро ҳақидаги ҳикояларни ўқимаган бўлган. Аммо ролга тайёргарлик жараёнида ҳаммасини ўқиб чиққан. Пуаронинг одатлари ва феъл-атворига оид, барча деталларни ўз ичига олган 93 та қайддан иборат 5 саҳифалик рўйхат тузган. У томошабинлар эътироз билдирмаслиги учун образ ва ижро бенуқсон бўлишини хоҳлаган. Суратга олиш майдончасида рўйхатни ўзи билан бирга олиб юрган ва фильм устида ишлаган ҳар бир режиссёрдан у билан танишиб чиқишини сўраган.
Семизроқ кўриниши учун костюм ичидан накладка кийишига тўғри келган
Суше суратга олиш ишлари бошланишидан аввалроқ образга тайёргарлик кўриш учун уйида Пуаро костюмини кийиб юрган. Бундан ташқари, Агата Кристи томонидан тасвирланганидек, Пуаро сингари калта қадамлар билан тез-тез юришни ўрганган. Уриниш ўхшаши учун боғ бўйлаб юриб чиққан.
Пуаро яшаган уйни сотиб олиш мумкин
Лондоннинг Флорин-Корт уйининг иккинчи қаватида жойлашган ва сериалда қаҳрамон Пуаро яшайдиган 203-хонадон сотувга қўйилган. Бир хонадан иборат ар-деко услубидаги студия нархи 335 минг фунт стерлинг (455 712 доллар)ни ташкил қилади.
Елизавета II томонидан тақдирланган
2002 йилда Суше Елизавета II томонидан Британия империяси ордени билан тақдирланган. Қиролича актёрнинг ўзи, оиласи ва халқининг завқланишига сабабчи бўлганини эътироф этган. 2020 йилнинг октябрида драматургия соҳасидаги хизматлари ва хайрия ишларида фаол экани сабаб Сушега рицар-бакалавр унвони берилган. Дэвид бир неча йилдан буён BAFTA — Буюк Британия кино ва телевизион санъати академиясининг аъзоси ҳисобланади, шунингдек, Британиядаги дарё ва каналларни сақлаш учун курашиб келади.
Оғир касаллар қўллаб-қувватланиши тарафдори
2014 йилда Дэвид набирали бўлган. Аммо чақалоқ даволаб бўлмайдиган ирсий касаллик — тубероз склероз билан туғилган. Шундан кейин актёр ушбу касалликка чалинганларга ёрдам берадиган уюшма ҳамда кам учрайдиган касалларга дори-дармон топишга йўналтирилган интернет-кампанияга аъзо бўлган. У набирасининг аҳволи яхшиланишга ёрдам берадиган дорини бепул қўлга киритиб бўлмаслиги, у каби оғир касалликларга учраган беморлар тиббиёт ноғорасига ўйнашига тўғри келишидан ташвишланади.
Изоҳ (0)