Фарғоналик аёл ўғлини уйлантираётгани ҳақида Шавкат Мирзиёевга айтди. Президент вилоят ҳокимига унинг номидан тўйга боришни тайинлади (видео)

Халқ депутатлари сессиясидан сўнг Шавкат Мирзиёев кутилмаганда Фарғона шаҳридаги «Шодиёна» маҳалласига борди. Маҳалла оралаб юриб, аҳоли билан учрашди. Бу ҳақда Президент матбуот хизмати хабар қилди.

«Мана, бугун вилоятларингизга янги ҳоким қўйдик. Маҳаллабай ишлаш тизимини жорий қиляпмиз. Ҳақиқий аҳволни билиш, одамларнинг оғирини енгил қилиш учун маҳаллангизга ўзим келдим», – деди Шавкат Мирзиёев аёллар билан суҳбатда.

Онахонлардан бири 6 февраль куни ўғлининг тўйи бўлишини айтди. Президент уларни табриклаб, ёш оилага бахт, соғлик тилади. Президент вилоят ҳокими Хайрулла Бозоровга онахоннинг исм-фамилиясини ёзиб олишни тайинлаб, ҳоким унинг номидан тўйга боришини билдирди.

Таъкидланишича, кутилмаган ташрифдан хурсанд бўлган одамлар давлат раҳбарига сиҳат-саломатлик, халқ учун тинчлик-фаровонлик тилаб дуо қилди.

Шундан сўнг Соҳибқирон Темур кўчаси бўйлаб юрилиб, уй-жойлар, савдо шохобчалари кўздан кечирилди.

Шавкат Мирзиёев маҳалла идорасига кириб, маҳалла раиси ва маслаҳатчилар билан суҳбатлашди. Аҳолининг яшаш шароитлари, ҳудуддаги муаммоларни сўради. Уларни ҳал этиш бўйича мутасаддиларга кўрсатмалар берди.

Аввалроқ Шавкат Мирзиёев ажралишларнинг олдини олиш муҳимлигини таъкидлагани ҳақида хабар берилганди.