Лондон узра қора булутлар: Жозе Моуриньо мураббийлик фаолиятида навбатдаги антирекордни қайд этди

«Тоттенҳэм» Англия Премьер Лигасининг 22-туридан ўрин олган учрашувда «Челси»га имкониятни бой бериб қўйди (0:1).

Бу «шпорлар» учун кетма-кет иккинчи уй ўйинидаги мағлубият бўлди. Жамоа бунгача 28 январь куни «Ливерпуль»га ҳам ўз майдонида ютқазиб қўйганди (1:3).

Gracenote’нинг ёзишича, Лондон клуби устози Жозе Моуриньо фаолиятида илк марта шундай натижани қайд этган. «Порту», «Челси», «Реал», «Интер» ва бошқа клубларда 327 та уй ўйинини ўтказган португалиялик мутахассис бунгача бирор марта кетма-кет икки бор ўз майдонида мағлуб бўлмаганди.

Шунингдек, «Тоттенҳэм» қаторасига 3-ўйинда мағлубиятга учради. Бунгача жамоа юқорида номи қайд этилган «Ливерпуль» ва «Брайтон»га имкониятни бой бериб қўйганди.

Моуриньо қўл остидаги «Тоттенҳэм»да 3 та ўйиндан иборат бўлган мағлубиятли серия бундан бир йил олдин ҳам қайд этилганди. Ўшанда «шпорлар» Чемпионлар Лигасида «Лейпциг»га (0:1), АПЛда эса «Челси» (1:2) ҳамда «Вулверҳэмптон»га (2:3) ютқазиб қўйганди.

21 ўйин ўтказган ҳолда 33 очко билан мусобақа жадвалида 8-ўринда бораётган «Тоттенҳэм» кейинги турда ўз майдонида «Вест Бромвич»ни қабул қилади.