“Tottenhem” Angliya Premyer Ligasining 22-turidan o‘rin olgan uchrashuvda “Chelsi”ga imkoniyatni boy berib qo‘ydi (0:1).
Bu “shporlar” uchun ketma-ket ikkinchi uy o‘yinidagi mag‘lubiyat bo‘ldi. Jamoa bungacha 28-yanvar kuni “Liverpul”ga ham o‘z maydonida yutqazib qo‘ygandi (1:3).
Gracenote’ning yozishicha, London klubi ustozi Joze Mourinyo faoliyatida ilk marta shunday natijani qayd etgan. “Portu”, “Chelsi”, “Real”, “Inter” va boshqa klublarda 327 ta uy o‘yinini o‘tkazgan portugaliyalik mutaxassis bungacha biror marta ketma-ket ikki bor o‘z maydonida mag‘lub bo‘lmagandi.
Shuningdek, “Tottenhem” qatorasiga 3-o‘yinda mag‘lubiyatga uchradi. Bungacha jamoa yuqorida nomi qayd etilgan “Liverpul” va “Brayton”ga imkoniyatni boy berib qo‘ygandi.
Mourinyo qo‘l ostidagi “Tottenhem”da 3 ta o‘yindan iborat bo‘lgan mag‘lubiyatli seriya bundan bir yil oldin ham qayd etilgandi. O‘shanda “shporlar” Chempionlar Ligasida “Leypsig”ga (0:1), APLda esa “Chelsi” (1:2) hamda “Vulverhempton”ga (2:3) yutqazib qo‘ygandi.
21 o‘yin o‘tkazgan holda 33 ochko bilan musobaqa jadvalida 8-o‘rinda borayotgan “Tottenhem” keyingi turda o‘z maydonida “Vest Bromvich”ni qabul qiladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)