«Azon.uz» бош муҳаррири Дин ишлари бўйича қўмита томонидан таҳририятга нисбатан босим ўтказилгани ва сайтда эълон қилинган айрим мақолаларни ўчиришни талаб қилгани сабабли ишдан бўшаганини эълон қилганди. Дин ишлари бўйича қўмита матбуот хизмати «Azon.uz» таҳририятига босим ўтказмаганини маълум қилди.
Қўмитанинг 4 февраль куни эълон қилган баёнотида айтилишича, ушбу сайтда эълон қилинган муайян мақолаларни олдириб ташлаш бўйича қўмита раҳбарияти томонидан ҳеч қандай топшириқ бўлмаган.
Шунингдек, Дин ишлари бўйича қўмита қатор ОАВлари билан доимий ҳамкорликда фаолият олиб бораётганини, Президент бошчилигида диний-маърифий соҳада амалга оширилаётган янгилик ва ўзгаришларни биргаликда омма эътиборига ҳавола қилаётганини алоҳида қайд этган.
Эслатиб ўтамиз, интернет тармоғида 3 февраль куни « ‘Azon.uz’га босим қачон тугайди?» номли баёнот орқали мазкур сайтнинг бош муҳаррири Абдулазиз Раимов таҳририятга нисбатан босим ўтказилгани сабабли эгаллаб турган лавозимидан озод этиш бўйича ариза бергани эълон қилинди ва бу ҳолат жамоатчилик орасида муҳокамаларга сабаб бўлди.
Абдулазиз Раимовнинг маълум қилишича, Дин ишлари бўйича қўмита раисининг ўринбосари Дилшод Эшнаев сайтда эълон қилинган икки мақола («Қорилар маҳалласи – Президентнинг таклифи аҳли илмларни тўлқинлантириб юборди» ҳамда «Шавкат Мирзиёев диний соҳада қандай эркинликларни қайтарди?») бўйича муассис Мубашшир Аҳмадга қўнғироқ қилиб, юқоридаги мақолалар учун жуда қаттиқ ҳақорат ва таҳдид қилган. Шундан сўнг Абдулазиз Раимов мақолаларни ўчиришдан бош тортган ва ишдан бўшаш учун ариза ёзган.
Абдулазиз Раимовнинг қўшимча қилишича, авваллари олиб ташланган бир неча мақолалар ҳам айнан Дилшод Эшнаевнинг қўнғироқлари орқасидан ўчирилган.
АОКА ҳолат юзасидан расмий баёнот билдириб, диний мазмундаги материалларни тайёрлаш ва тарқатишда низоли ҳолатлар юзага келганда ҳам масаланинг ечими суд орқали ҳал этилиши белгиланганини айтиб ўтди.
Агентлик доимгидек давлат органлари ва оммавий ахборот воситаларини қонунчиликда кўрсатиб ўтилган қоидалар ҳамда ўрнатилган талабларни ҳурмат қилган ҳолда ўзаро муносабатларга киришишга чақирган. Шунингдек, давлат идораларини журналистларга нисбатан босим ўтказмаслик, таҳририят ходимларини эса журналистлик одоб-ахлоқ қоидаларига амал қилишини сўраган.
Изоҳ (0)