Ички ишлар органлари ходимлари сўнгги кунларда ижтимоий тармоқлар орқали бир-бирини ҳақорат қилиб келаётган ўзбек шоу-бизнес вакиллари Аҳад Қаюм ва Азиз Раметов билан профилактик суҳбат ўтказди. Бу ҳақда ИИВ матбуот хизмати хабар берди.
Ижтимоий тармоқларда Азиз Раметов ва Аҳад Қаюм ўртасидаги тортишувлар видеоси кенг тарқалмоқда. Унда шоу-бизнеснинг икки вакили бир-бирини қандайдир сабаблар билан ҳақорат, шунингдек, бир-бирининг «оёқ-қўлини синдириб, ногиронлик аравачасига михлаб қўйиш» билан таҳдид қилганини кўриш мумкин.
ИИВнинг маълум қилишича, уларнинг бу каби ҳаракатлари фуқароларнинг эътирозига сабаб бўлган. Шу сабабли иккала актёр билан ҳам профилактик суҳбат ўтказилган.
«Мени исмимни олиб, бир жойда гапиргани учун мен ҳам уларга нисбатан эҳтиросга берилиб, гапирган гапларимдан жуда ҳам қаттиқ афсусдаман. Азиз Раметовга қилган мурожаатим ёки баъзи бир нотўғри хатти-ҳаракатаримиз учун минг бор узр сўрайман», — дейди Аҳад Қаюм.
Ўз навбатида, Азиз Раметов ҳам ўзининг бу каби хатти-ҳаракатлари учун узр сўраган. «Қизишиб, гапирган гапларим учун узр сўрайман. Кузатувчи сифатида дили ранжиган юртдошларимиз, ватандошларимиздан узр сўрайман», — дейди актёр.
Профилактик суҳбат жараёнида ушбу шахслар келгусида яна фуқароларнинг шаъни ва қадр-қимматини беодоблик билан камситиш, ОАВ ва интернет тармоқлари орқали таҳқирлаш, жамиятда юриш-туриш қоидаларини бузиш каби ҳаракатларни содир этса, маъмурий ёки жиноий жавобгарликка тортилиши ҳақида расман огоҳлантирилган.
Изоҳ (0)