Тошкент вилоятининг Янгийўл шаҳридаги 6-мактаб синфхоналарининг бирида шифт кўчиб тушиб, икки ўқувчи жароҳатланди. Уларга зудлик билан тиббий ёрдам кўрсатилди.
Халқ таълим вазирлиги матбуот хизматининг хабар беришича, мазкур мактабдаги мукаммал таъмирлаш ишлари 2019 йилда Тошкент вилояти буюртмасига асосан вилоятга ажратилган қўшимча 3,3 миллиард сўм маблағ эвазига «Аҳмадхожи ал-Аваз» МЧЖ томонидан амалга оширилган.
Айни дамда шаҳар ҳокимининг топшириғига кўра шаҳар прокуратураси, халқ таълими бўлими мудири, қурилиш ташкилоти билан биргаликда мактабни шифт қисмларининг чидамлилигини қайта текширувдан ўтказилмоқда.
«Келгусида бу каби нохуш ҳолатларнинг олдини олиш мақсадида барча вилоятлардаги қурилиш бўйича мутасаддилар ҳамда қурувчи ташкилотлардан мактаблардаги қурилиш ва таъмирлаш ишларига масъулият билан ёндошишни, унинг сифат жиҳатига алоҳида эътибор берган ҳолда мактабни келгусида болалар эксплуатацияси учун хавфсиз ҳолда топширишни сўраб қоламиз», — дейилади вазирлик хабарида.
2020 йилнинг октябрь ойида Навоийда 4 миллиард сўмга қурилган болалар боғчаси 8 ой ўтиб таъмирталаб аҳволга келгани ҳақида хабар берилган эди.
Президентнинг «2021–2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги қарорига кўра, Ўзбекистонда 22 та боғча, 31 та мактаб ва 16 та ОТМ қурилади.
Изоҳ (0)