Фуқаролик ишлари бўйича Учтепа туманлараро суди марҳум турколог Андрей Кубатиннинг опаси Клара Сахарованинг укасига етказилган маънавий зарар учун Тошкент шаҳар Молия бошқармасидан 3,5 миллиард сўм миқдорида компенсация ундириш тўғрисидаги даъвосини қондирмади, деб хабар беради «Kun.uz»
29 январь куни бўлиб ўтган суд мажлисига молия бошқармасидан вакил келмаган. Судья Ҳилола Эргашева йиғилишни бошқа санага кўчириш таклифини берган, бироқ Клара Сахарова жавобгар томонсиз судни давом эттиришга рози бўлган.
Судья қарор қабул қилиш учун алоҳида хонага кириб чиққанидан сўнг иш бўйича ҳал қилув қарорини эълон қилган. Унга кўра, Клара Сахарованинг даъво талабларини қаноатлантириш рад этилган. Шунингдек, судья процесс иштирокчиларига нима сабабдан бундай қарорга келганига тўлиқ изоҳ бериб ўтган.
Фуқаролик-процессуал кодекснинг 17-моддасига кўра, фуқаролик ҳуқуқлари ва мажбуриятларига эга бўлиш қобилияти барча фуқаролар учун тенг равишда тан олинади. Фуқаронинг ҳуқуқий лаёқати унинг туғилган пайтидаёқ вужудга келади ва унинг ўлими билан тугайди, дейди у.
Мерос очилаётганда мерос қолдирувчига тегишли бўлган барча ҳуқуқ ва мажбуриятлар мероснинг бир қисмидир ва уларнинг мавжудлиги унинг ўлими билан тугамайди. Бироқ мерос қолдирувчининг шахсияти билан узвий боғлиқ бўлган ҳуқуқ ва мажбуриятлар мероснинг бир қисми ҳисобланмайди. «Унинг ҳаёти ёки соғлиғига етказилган зарарни қоплаш ҳуқуқи ҳам шулар жумласидан», — дея қўшимча қилади судья.
«Яъни мазкур ҳолатда маънавий зарар учун компенсацияни фақат реабилитациядан чиққан шахс олиш ҳуқуқига эга. Шу билан бирга, суд даъвогарга Жиноят-процессуал кодексининг 304-моддасига биноан реабилитация қилинган шахс вафот этган тақдирда, ушбу модданинг 2-бандига кўра, товон пулини — боқувчисини йўқотганларнинг нафақаси билан таъминланган, унинг оила аъзолари қаторига кирадиган қариндошлари олиши мумкинлигини тушунтиради», — дейди судья.
Клара Сахара суднинг мазкур қарори билан тўхтаб қолмаслигини ва мурожаат қилишни давом эттиришини билдирган. «Керак бўлса, Ўзбекистондаги барча инстанцияларга бораман, ундан кейин Европа судига материалларни тақдим этаман», — дейди Кубатиннинг опаси.
Эслатиб ўтамиз, Тошкент давлат шарқшунослик институтининг катта ўқитувчиси бўлиб ишлаган турколог олим Андрей Кубатин 2017 йили Жиноят кодексининг 157-моддаси (давлатга хоинлик қилиш)да назарда тутилган жиноятни содир этишда айбланиб, ҳибсга олинган эди.
«Чет эл олимига ноёб китобларнинг сканер қилинган нусхаларини топширгани» ҳақидаги айблов хулосаси билан олимга нисбатан ўша йили 11 йилга озодликдан маҳрум қилиш жазоси тайинланди, апелляциядан сўнг бу муддат 5 йилга туширилди. Бу орада Халқаро инсон ҳуқуқлари ташкилотлари ва Кубатинни таниган дунёнинг йирик олимлари бу иш уюштирилганини айтиб, Президентга мурожаат қилди.
2019 йил 26 сентябрь куни жиноят ишлари бўйича Тошкент вилояти судида Андрей Кубатиннинг иши қайта кўриб чиқилган ва олим тўлиқ оқланиб, суд залидан озод этилганди.
2,5 йиллик қамоқдан сўнг Кубатин 2019 йил декабрдан буён Ўзбекистон Фанлар академияси Миллий археология марказида фаолият юритиб келди.
2020 йил 29 октябрь куни турколог олим Андрей Кубатин коронавирусдан хасталаниб, шифохонада вафот этди.
Изоҳ (0)