Давомийлиги бўйича рекорд ўрнатган фильм: Раж Капурнинг «Сангам» фильми ҳақида қизиқарли маълумотлар (фото)

Раж Капур томонидан суратга олинган фильмлар кўпинча романтикага бағишланган бўлса-да, ушбу севги ҳикояси ҳинд киноси тарихида алоҳида ўрин тутади. У кўплаб режиссёр ва продюсерларга севги учбурчаги ҳақида ўз фильмларини яратишга илҳом берган киши эди.

Фильм томошабинларга таъсири туфайли шу даражада машҳурликка эришдики, йиллар ўтиши билан ҳатто «Сангам» қўшиқларининг номлари бошқа фильмлар учун ҳам ишлатилган. Масалан, «Mere Sanam», «Bola Radha Bol», «Radha ka Sangam», «Har Dil Jo Pyar» каби. Айрим ишбилармонлар эса ўзларининг меҳмонхона, ресторан ва кинотеатрларига «Сангам» номини берган.

Бу Раж Капурнинг илк рангли ва қисман чет элда − Венеция, Париж, Швейцария ва Лондонда суратга олган биринчи фильм эди: чет эл саҳналари тасвирлари ўша пайтда Ҳиндистондаги томошабинларга шундай таъсир ўтказганки, «Сангам»дан кейин у ерда фильм суратга олиш урфга кирган.

Раж Капур ушбу фильмни 1940 йилларнинг охирларида бош ролларда Дилип Кумар ва Наргис иштирокида«Гаронда» номи остида суратга олмоқчи эди. Келажакда сценарий учун асос бўлган воқеани Индер Раж Ананд ёзган, ўша пайтда «Ааг» суратга олингандан сўнг Ражнинг режиссёр сифатида биринчи фильми эди. Бироқ лойиҳа маълум сабабларга кўра доимий равишда кечиктирилган. Жараён 1962 йилгача давом этган, кейин фильм «Сангам» деб ўзгартирилган. Бу вақтга келиб Наргис Сунил Датт билан никоҳидан кейин кино соҳасини тарк этиб улгурган эди. Фильмнинг номи учта асосий қаҳрамоннинг ўзаро муносабатини акс эттирган, улар ҳиндуийликда алоҳида аҳамиятга эга бўлган учта дарё: Ганг, Ямуна ва Сарасватига таққосланган. Уларнинг қўшилиш жойи эса Сангамдир.

Раж Капур Гопал ролини ижро этиш учун Дилип Кумарга таклиф билан чиққан, аммо охир-оқибат у рад этган. Кейин бу рол Дев Анандга таклиф қилинган, аммо актёр бошқа фильмлардаги суратга тушиш ишлари кўплиги ва Сангам учун вақт ажрата олмаслигини маълум қилган. Гопал ролига навбатдаги номзод – Ражендра Кумар эди ва у таклифни қабул қилган. Суратга олиш жараёнида Раж ва Ражендра шу қадар яхши келишганки, улар кейинчалик ҳам энг яхши дўст бўлиб қолган. Ражендранинг ўғли Кумар Гаурав Ражнинг қизи − Рима билан турмуш ҳам қурмоқчи бўлган. Аммо ёшлар маълум сабабларга кўра унаштирувни бузган, шундан кейин Раж ва Ражендра орасида муносабат ҳам салбий томонга ўзгариб кетган.

Вижаянтимала Радҳанинг асосий роли учун танланган, у билан Раж илгари «Назрана» фильмидагина биргаликда ишлаган эди. Миш-мишларга кўра, Раж актрисани Дилип Кумарнинг гуруҳидан олиб чиқмоқчи бўлган, чунки ўша вақтларда улар энг машҳур жуфтликлардан бири бўлган. Аммо Раж актрисани ушбу ролга таклиф этганда, у таътилда, икки йилдан буён суратга тушмаётган эди. Вижаянтимала бироз иккиланса-да, кейин рози бўлган. Суратга олиш жараёнида режиссёр ва унинг орасида ишқий муносабатлар ҳам пайдо бўлган, аммо фильм якунлангач муносабатларга ҳам ўз-ўзидан нуқта қўйилган.

Шу тарзда маҳоратли актёрлар учлиги ижросида тушунмовчилик, ажралиш, қурбонлик, хайрлашиш ва қайғу ҳақидаги ажойиб воқеа ўтган аср 60 йилларнинг томошабинларини том маънода сеҳрлаб қўйган. Ҳиндистон тарихида биринчи марта ушбу кино намойиши учун жойлар олдиндан буюртма қилинган.

«Сангам» давомийлиги бўйича ҳам рекорд ўрнатган фильмдир. Унинг асли 238 дақиқа давом этади ва театрларда икки интервал билан намойиш этилган. Бу ҳам ҳинд кинематографиясида биринчи янгилик бўлган. Шунингдек, фильм Советт иттифоқи, Туркия, Болгария, Греция ва Венгрияда сезиларли қисқартиришлар билан намойиш этилган.

Танқидчиларнинг кўнглидан жой олган «Сангам» «Болливуднинг энг буюк севги учбурчаги» ҳақидаги фильм деб баҳоланган. Ҳиндистонда ушбу картина 1964 йилдаги энг кассабоп фильм ва 1960 йиллардаги «Буюк Мўғул»дан кейинги иккинчи ўринни эгаллаган.

«Сангам» бир неча номинациялар бўйича олтита Бенгал киножурналистлари ассоциацияси мукофотига ва тўртта Filmfare мукофотига сазовор бўлган. Ушбу фильмнинг намойишга 50 йилдан кўпроқ вақт ўтган бўлса-да, ҳанузгача унинг томошаси инсонни ҳаяжонга солади.