Ҳиндистонда коронавируснинг тарқалиш суръатлари секинлашди

Ҳиндистонда коронавирус тарқалиш суръатлари камайди ва ўтган бир ҳафта давомида 146 та округда бирорта ҳам ҳолат аниқланмади. Бу ҳақда мамлакат соғлиқни сақлаш вазири Харша Вардханага таяниб, The Hindu хабар берган.

Вазирнинг қайд этишича, мамлакатда ўтган 24 соат ичида (2021 йил 28 январь ҳолатига кўра) 12 мингдан камроқ COVID-19 инфекциясини юқтириб олиш ҳолатлари аниқланиб, шундан 165 киши вируснинг Британия штамми экани тасдиқланган.

Даволанаётганлар 173 минг нафарни ташкил этади, уларнинг 0,46 фоизи сунъий нафас бериш аппаратларида, 2,2 фоизи жонлантириш бўлимида касаллик билан курашмоқда.

Ҳиндистон ҳукумат томонидан коронавирус инфекциясига қарши курашиш учун жами 11 миллион 240 минг доза вакцина провинция ва штатларга тарқатилган.

Ҳиндистон бутун дунёда коронавирус билан касалланганлар сони бўйича АҚШдан кейин иккинчи ўринда бормоқда. Пандемия бошидан буён мамлакатда 10,7 миллион нафардан ортиқ аҳоли вирусга чалинган. 153,8 минг нафар бемор COVID-19 асоратлари оқибатида ҳаётдан кўз юмган.