Ўзбекистонда 15 февралдан валюта олди-сотди операциялари тартиби ўзгаради

Ўзбекистон Марказий банки ички валюта бозорида валюта олди-сотди операцияларини такомиллаштириш тўғрисидаги қарорни қабул қилди.

Қарорга мувофиқ, 2021 йилнинг 15 февралидан бошлаб:

• Ўзбекистон республика валюта биржасида савдо сессиялари амалдаги «фиксинг» усулидан «колл аукцион» ва икки томонлама узлуксиз аукцион «метчинг» савдо усулларига ўтказилади.
• Валюта биржасида валюта олди-сотдиси бўйича савдо сессиялари соат 10:00 дан 15:00 гача «Онлайн платформа» орқали амалга оширилади.
• Валюта биржасида валюта олди-сотдиси бўйича ҳисоб-китобларнинг ҳозирда мавжуд Т+0 (бугунги иш куни) шаклидан Т+1 (кейинги иш куни) шаклига ўтказилади.
• Тижорат банкларининг валюта биржаси савдоларида мижозлар номидан иштирок этиши бекор қилинади (энди тўғридан-тўғри валюта позицияси орқали амалга оширилади).

«Амалга оширилаётган ўзгаришлар ички валюта бозорининг инфратузилмасини такомиллаштириш, валюта курсининг шаклланишида тижорат банкларининг ролини янада ошириш ҳамда тадбиркорларнинг маблағларини зарур бўлган валюталарга тезкор равишда алмаштириш имкониятларини яратади», — дейилади Марказий банк хабарида.

Марказий банк раиси ўринбосари Беҳзод Ҳамроев Марказий банк томонидан 2021 йил амалга оширилиши мақсад қилинган асосий режалардан бири – миллий валютанинг чет эл валютасига қарамлигини камайтириш ва инфляция даражасининг 10 фоиздан ошиб кетмаслигини таъминлаш эканлигини билдирганди. Шунингдек, тадбиркорлар тижорат банкларидан онлайн тарзда буюртма бериб тўғридан-тўғри валюта харид қилиш имкониятига эга бўлади.

Шавкат Мирзиёевнинг Олий Мажлисга йўллаган Мурожаатномасида 2021 йилда нарх-наво ўсишини 10 фоиздан оширмаслик Марказий банк ва ҳукуматнинг асосий вазифаси бўлиши кераклиги таъкидланганди.